طالب الإعلامي عمرو أديب، الجهات المختصة بالدولة بمحاسبة شركة أوبر للنقل بعد تكرار حوادث التحرش من قبل السائقين التابعين لها.
وخلال برنامج "الحكاية" المذاع على قناة "إم بي سي مصر" قال أديب: "يقولك شركة عالمية وفاتحة بيوت طيب ما تفتح بيوت، أما أقول في تجاوزات ولازم تحقيقات إيه العيب؟ الأغرب من ده كله يقولك على فكرة دي مش مشكلة أوبر دي مشكلة الشعب لازم الأول الأخلاق".
وأكمل: "حد تاني يقولك إيه هو إحنا قد دول، دي شركة كبيرة، كبيرة على نفسها إحنا كمان كبار، هو إحنا بنركب الشركات دي مدعومة من وزارة التموين؟ إحنا أكبر سوق إحنا بندفع فلوس".
وتابع: "في 2017-2018 كنت أكتر واحد متحمس للشركات دي، أو تقولي على فكرة أنا كأوبر أو كريم باخلي مسؤوليتي مع بعض إحنا ملناش دعوة ورجعنا لأيام التاكسي الأسود بتاع زمان، قولي كده وأنا أبقى فاهم من الأول أن أنت متساويش الفلوس اللي بدفعها دي".
وواصل: "هو أنا بدفع الفلوس ليه؟ عشان الأمن والراحة وبعدين إيه حالة التجاهل اللي عملاه الشركة دي والشركات التانية للناس، ما تكلمونا كده قولي أنت عملت ايه؟ قولي أنت غيرت الناس اللي بتختار الكباتن؛ لأن حصل تجاوزات، طمني إشمعني أنا البلد الوحيدة اللي مبتكلمنيش".
وأردف "أديب": "يقولك أصل ده أبلكيشن، لما جابو زوكربيرج بتاع الفيسبوك وقالوله أنت بتعمل إيه عيالنا في أمان ولا لا، وطبعا أوبر مستنية، أصل دا شعب بينسى ديته هيعمل هاشتاج ويخلص، النهاردة لقيت المجلس القومي للمرأة مطلع بيان ومضايق وزعلان، دا واحدة مانت وواحدة بكتر".
وأكمل: "وتسأل تقول يا جماعة هو الناس دول واخدين ترخيص؟ يقولك أه يبدو كده، تقرأ مين المسؤول عنهم في الترخيص؟ وزارة النقل طيب بالعقل ده ناس بتنقل ودا وسائل نقل يبقى، هي المسؤولة عن الموضوع ده".
وذكر: "تروح تجيب الراجل المصري اللي بيأخد آلاف الدولارات وإذا مكانتش وزارة النقل هتتصدى في رئيس الوزراء، انتوا مش عايزين حد يحميكوا؟ انتوا مش عايزين تخدوا حقوقكم؟ يا جماعة أتحدى تقولي في مصر نملة محدش مسؤول عنها، ده مصر بلد المسؤوليات".
واختتم: "انتوا ناويين تسيبونا كده بينا وبينهم؟ أوبر اشترى كريم وفي حصة احتكارية جوه المجتمع وواخدين أغلب السوق، أنا مع أوبر وكريم وأن الناس تأكل عيش ولكن في النهاية أنا عايز الأمن والأمان".
تابعوا آخر أهل مصر على Google News
