وجهت الدكتورة إمامة محمد، التي تعافت من كورونا هي ووالدها وخمس من أشقائها، العديد من النصائح لأهالي بورسعيد والمصريين بشكل عام، حتى لا يستهينوا بفيروس كورونا، ويلتزموا بالإجراءات الوقاية والاحترازية لتجنب الإصابة بالفيروس المستجد.
وعبر صفحتها على موقع التواصل الاجتماعي "فيسبوك"، قالت الدكتورة إمامة محمد: "ازيكم يا جماعه أنا كنت مريضة كورونا والحمد لله خفيت حبيت بس اتكلم عن التجربة عشان هى مش سهلة خالص زي ما بعض الناس مفكره، اولا حط في بالك ان مناعتك هى الاساس بس ده ما يمنعش انك ها تبان عليك اعراض اولا سخونية ذورك مقفول وصعوبة في البلع احتقان شديد لدرجة ان الهواء اللى بتتنفسه يبقي مؤلم ،الم شديد في المعدة اسهال صعوبة في التنفس".
وتابعت إمامة: "العلاج اللى بتاخده ما بيعملش حاجة هو بس بيساعد جسمك في المقاومة بالاضافة ان له اعراض كبيره كانت بتوصل للترجيع و تشنجات حصلت لاختي، الماسحة بتتاخد يوم بعد يوم تقريبا واحب اقولكم انها مش سهلة خالص خصوصا لو عندك احتقان شديد، عينات دم يوم بعد يوم وبعض الحالات بتتاخد شريانى، الحاله النفسية صدقوني بتبقي زفت مهما الناس حاولو معاكم، حالتك الصحية بعد المرض بتتاثر جدا انا لحد الان انا واخواتي بنعاني صعوبة في التنفس وجع في المعده وارتجاع اختي مبتعرفش تاكل من ساعة ما طلعت و وجع في الضهر".
وقالت الدكتورة المتعافية: "كل ده الناس في غني عنه لو حافظت علي نفسها وعلي عيالها واهلها الوضع لكبار السن بيفرق جامد بتبقي أصعب واشد من كده صدقوني بتوصل انه بيتحط علي جهاز تنفس ليقوم منها او ما يقومش مش هتبقوا مبسوطين وانتم بتخسروا حد عزيز عليكم لمجرد "الاستهتار"، كل ده وكان معانا اطباء وممرضين عارفين يقوموا بشغلهم وعدينا منها بفضل ربنا ثم بهم".
واختتمت ابنة بورسعيد نصائحها، بالقول: "الوضع الفتره دي العزل في البيت وحبيت أعرفكم ان العلاج مش متوفر اصلا ومش هيبقي معاكم حد هيتقفل عليكم الباب يا تعدو منها يا ما متعدوش بمعني اصح "انت ومناعتك " كل ده انتم في غني عنه حافظوا علي انفسكم وعلي اهلكم واولادكم و ربنا يسلمنا جميعا".
تابعوا آخر أهل مصر على Google News
