اختلفت الآراء حول فرض غرامات فى المرحلة القادمة على من لا يقومون باستعمال الكمامات كإجراء وقائي واحترازي لفيروس كورونا المستجد فكان هناك بعض الآراء لعدد من المواطنين فمنهم من طالب بضم الكمامة على بطاقة التموين مثلها مثل باقي السلع التموينية والبعض الاخر طالب بضرورة توزيعها بالمجان فى المصالح الحكومية خاصة فى المرور وأقسام الشرطة والأحوال المدنية والجوازات والأحياء والشهر العقاري وغيرهم.
الاسعار محددة في الجريدة الرسمية للكمامات
يقول الدكتور شريف صالح، إنه من الممكن نزول الكمامات على بطاقة التموين للناس أتمني هذا يحدث بعد كده افرض براحتك غرامات للغير ملتزم بس نوفرها للناس الأول"، مضيفا أنه بعد الرجوع والتأكد طبقًا لتوصيات منظمة الصحة الأمريكية للتاكد من أن الكمامة الطبية سليمة أم لا، هتعرف إزاي إذا كانت أمان أم لا، هتلبس الكمامة وتجيب شمعة وتولعها انفخ فيها لو متطفتش يبقى تمام لكن لو انطفأت تعرف أن ملهاش لازمة، متابعا: "برجاء عدم الذهاب لأي مكان فيه تعامل مع أشخاص واحتكاك بناس بدون كمامة".
وأوضحت ألاء عرابي: "بنشتري الكمامة والجونتي بـ12 جنيه من الصيدلية المطلوب إني كل ما أنزل أجيب كمامة وجونتي بالسعر ده حرام حقيقى لأن ده مصروف تاني ويجب توفير الكمامات بأسعار تتناسب وتتلاءم مع دخل المواطن ونراعي أن الأسرة بتتكون من مجموعة من الأفراد وليس فرد واحد".
وعلق السيد غالي: "مش كل الناس معاها بطاقات تموين ولو نزلت علي البطاقات سيعطون لكل واحد واحدة يستخدمها مرة وطول الشهر يعمل ايه فالكمامة بعد لبسها لمرة واحدة وتترمي الناس هتجيب "بالدستة" منين".
وقالت مايا بسيوني: "صح اقتراح جميل جدا يبقى وفرها للناس وساعتها ما يبقاش عند الشعب حجة بس للاسف انا من الناس اللي مش بقدر البس كمامة جايبة بس مش بقدر بتخنقني في التنفس جدا علشان حساسية جيوب الانفية زيادة عندي اعمل ايه ؟ لما بنزل للضرورة بيبقى معايا مناديل لو عطست كحول كل شوية اطهر ايدي او اي حاجة المسها و مش بروح اماكن فيها ازدحام".
بينما أشارت إيمان يونس إلى أن عدم توافر الكمامات يسبب "كارثة" "لأن ناس كثيرة هتكون محتاجه خايفه من الغرامة الأسرة الواحدة ممكن تستخدم نفس الكمامة أو يحصل أسوأ من كده ونلقي غيرهم أكثر احتياج بيخدوا الكمامات من الشارع تستخدمها تاني".
بينما ناشد عبد السلام شحاته المسئولين بضرورة توفير الكمامات وتوزيعها فى جميع المصالح الحكومية "بالمجان" على جميع الموظفين ومن هنا الموظف يستقبل المواطن وهو يرتدى الكمامة فيكون اتخذ وسيلة لوقايته ولوقاية أسرته.
تابعوا آخر أهل مصر على Google News
