قامت حملة تمرد على المناهج التعليمية المصرية بعمل استفتاء، حول ما تم تداوله عن دراسة وزارة التربية والتعليم والتعليم الفنى بجعل تدريس مادتى العلوم والدراسات من الصف الأول الإبتدائى بدلا من الرابع الإبتدائى، وذلك على هيئة أنشطة مبسطة.. ونرصد في السطور التالية نتيجة الاستفتاء وأراء أولياء الأمور.
95% يرفضون
تبين من الإستفتاء أن 95% من أولياء الأمور يرفضون هذا المقترح لعدة أسباب منها عدم الضغط على الأطفال فى دراسة المناهج، بالإضافة الى تأسيس طلاب المرحلة الإبتدائية أولا فى مادة اللغة العربية، ثم العمل على تأسيسهم فى باقى المواد الدراسية بالتدريج.
الطريقة غلط
قالت إيناس حاشد أحد أولياء الأمور الرافضة للمقترح: "مشكلة الدراسات ان طريقة شرحها غلط وطريقة امتحان الطالب فيها غلط.. المدرس معندوش ملكة الشرح الشيق اللى يحبب الطالب فى المادة، والامتحان بيقيس مدى الكم اللى الطالب حفظه.. مفيش صفحة فى الكتاب الا ولازم تتحفظ.. ازاى عقل طفل يستوعب كل الحفظ ده!!، وده السبب فى كراهية الطلاب ليها.
مادة بشعة
تابعت إيناس: اعتمادها الفظيع على الحفظ وكم الدش اللى فيها مخليها مادة بشعة مش بيستفاد منها الطالب أد ما بيتعذب فى مذاكرتها، وبيتعقد من امتحانها، لو طريقة شرحها تبقى ممتعة وفيها تشويق، لو امتحانها يبقى موضوعى اختار من متعدد وصح وغلط فقط، يمكن كانت تسهل شوية، تخلى الطالب يستمتع بقرايتها بدون ضغط انه لازم يحفظ كل سطر فيها يعنى ميبقاش الأساس حفظ، وده طبعا صعب يحصل، بعد كل ده نبلى بيها كمان الطفل فى سنة أولى، بجد حرام.. حسبى الله ونعم الوكيل لنا الله".
مناهج عقيمة
من جانبه قالت سامية جودة أحد أولياء الأمور: "في ظل المناهج العقيمة الموجوده وأسلوب التعليم التحفيظي لا أوافق، لكن لا مانع عندما تتوازن المواد ويتم تبسيطها وتغير الهدف وهو الحفظ إلى النشاط والهواية".
مجرد نشاط
أما الـ5% الموافقون على هذا المقترح يفضلون أن يتم تنفيذ هذا، ولكن بدون أى إمتحانات بداية من الصف الأول الابتدائى حتى الرابع الإبتدائى، حيث قالت سميرة أحمد أحد الموافقون: "ياريت فعلا يدرسوها للاولاد من الصف الاول، انا معلمة علوم ابتدائى واحنا المعلمين بنطالب بكده من زمان بشرط ان العلوم يكون مجرد نشاط يعنى ملهوش امتحان وكتاب العلوم يكون مجرد تلوين وتوصيل، والمعلومات اللى تلاميذ الصفوف الاولى ياخدوها تكون مجرد تمهيد للاولاد وتعريف بمادة العلوم، لكن تعتبر نشاط ليس له منهج ولا امتحان ولا درجات اعمال سنة، وعلى فكرة انا ابنى كان بيدرس الساينس فى مدرسته من كى جى كنشاط علمى، ولما وصل لسنة رابعة مكنش مخضوض من العلوم لانه عنده فكرة عنه".
تابعوا آخر أهل مصر على Google News
