مرحلة الجامعة من أهم المراحل في حياة الإنسان، لأنها تعتبر نقلة نوعية من مرحلة الطفولة والمراهقة التي نأتي بها من المدرسة إلى مرحلة الشباب التي تنقلنا إلى الجامعة، وكثير من الشخصيات تتحول تمامًا خلال هذه المرحلة وتصبح أكثر نضجًا، ويكون ذلك نتيجة التجارب التي نمر بها واتساع مساحة العلاقات الشخصية وأشياء أخرى كثيرة بخلاف ما يدرس داخل قاعات الدراسة "المدرجات".
الحاجات الحلوة والذكريات اللي ما تتنسيش في الجامعة مش كلها حاجات جادة أو مشاكل صعبة أو ليها علاقة بالدراسة، لكن في حاجات تانية أبسط من كده بكتير لكن عمرها ما بتتنسي وبتفضل ذكريات جميلة، تعالوا نفتكر شوية منهم
1 - شؤون الطلبة:
شؤون الطلبة وموظفة شؤون الطلبة، شيء مش بينساه كل خرجين الجامعة، مفيش حد اتخرج من الجامعة ومكنش عنده موقف مع موظفة شؤون الطلبة، ده غير الطوابير اللي كان كل الدفعات بتعترف على بعض فيها لأنها ممكن تطول بالساعات، وبنكون منفعلين ومتعصبين جدًا وقتها، بس بمجرد ما بنفتكرها بعد التخرج بنصاب بكريزة الضحك.
2- أكلة من كافتريا معينة:
كل واحد في الجامعة بيبقى عنده أكلة أو سندوتش بيحبه من كافتريا معينة في الجامعة، بيفضل معلق عليه لحد ما يتخرج، وبعد التخرج ممكن يزور الجامعة مخصوص عشان يأكله.
3 -مكان تجمع ليه هو وشلته:
كل شلة صحاب في الجامعة بيبقى ليهم مكان معين في الجامعة بيقعدوا فيه أكتر ما بيقعدوا في مدرجات الدراسة، وبيبقى معروف أن المكان ده خاص لشلة معينة في الدفعة ومحدش بيقعد مكانهم، غالبًا بيبقى متميز عند بنك معين في الجامعة أو كافتريا أو حتى شجرة المهم لازم يبقى أسمه عند الـ"البنك، الشجرة، الكافتريا ...)
4-شلة الجامعة نفسها
شلة الجامعة اللي هتكمل معاك مش شرط تكون أول مجموعة اتعرفت عليهم ممكن تفضل تتغير لحد ما تقابل الناس اللي يبقى في بينكوا "كيمياء" وتبقى هي دي "شلة الجامعة" بتاعتك، وغالبا هيبقى كل فرد في الشلة دي ليه أسم مستعار بيتنادى بيه راجع لأشهر صفة فيه، زي ( أحمد هدوء، سارة توتر، أية سيطرة وكريم دحيح وهكذا).
5-أول بنت وأول ولد
بالنسبة للبنت مش هتنسى أول ولد اتعرفت عليه في الجامعة، وكذلك الولد مش هينسى أول بنت اتعرف عليها في الجامعة، وفي الغالب هيفضلوا أصحاب وهيكونوا بقية الشلة.
6-مشروع التخرج:
الكليات اللي بيبقى فيها مشاريع تخرج غالبًا أصحبها بيتمتعوا بأكبر كمية من الذكريات المضحكة والصور في الجامعة، على قد ما بتبقى أيام مرهقة بس بيبقى فيها مواقف جميلة عمرك ما بتنساها.
7-رحلات الجامعة:
الرحلات اللي هتطلعها وإنت في الجامعة غالبًا عمرها ما هتتعوض ولا هتتكرر بعد ما تتخرج، حتى لو روحت نفس الأماكن بس مش هتكون زي ما روحتها مع شلتك أيام الجامعة.
8- الأنشطة الطلابية:
كتير من الطلبة بيقضوا وقت كبير في الأنشطة الطلابية يمكن أكتر من محاضراهم الأساسية، وهوايتهم المشاركة في الأنشطة والتنقل ما بينها، وفي منهم اللي بيبقى كل صحابه من النشاط الطلابي المشترك فيه ومعندوش أى أصحاب في دفعته.
9- دكتور أو معيد معين
من بين كل الأساتذة اللي بنقابلهم خلال فترة الجامعة، بيفضل دكتور أو معيد واحد معلق معاك، وانت كمان بتكون معروف جدًا بالنسبة له برغم آلاف الطلاب اللي بيتعرضلهم كل سنة ويسأل عليك أول ما يدخل المدرج وده غالبا بيبقى بعد موقف محرج معاه، وممكن تفضل على علاقة جيدة بيه بعد التخرج.
10-سلالم الجامعة:
وأخيرًا سلالم الجامعة اللي من غيرها مش عارفين كنا هنستنى بين المحاضرات فين أو هنقعد نراجع قبل الامتحان فين.. سلالم الجامعة مليانة حكايات بين كل الطلاب على مر السنين عمرهم ما بينسوها.
تابعوا آخر أهل مصر على Google News
