عبرت مي كساب، عن حالة حزنها الشديد بكلام مؤثر دونته عبر حسابها الرسمي بموقع التواصل الاجتماعى "انستجرام"، وقالت: "ما كنتش عاوزة أكتب أي حاجة ولا اتكلم، بس اتعودت إنكم جزء مني بفرغ اللي جوايا معاكم، وبفرح بكلامكم الحلو اللي بيديني كل الطاقة الإيجابية اللي بتخليني قادرة أكمل في الحياة".
وتابعت" "إمبارح كان يوم وحش قوي، أصعب من يوم وفاة أمي، أول مرة هقول الكلام ده في حياتي، لما أمي ماتت فضلت تعبانة نفسيا جدا وحاسة أن أنا السبب، أنا اللي أخدتها أاديتها الإشعاع، وفضلت عايشة كتير بالإحساس ده، بس الحمد لله ربنا كان حاضني جدا وأداني إشارات كتير قوي تبرد قلبي، وأنا الحمد لله جريت على الكعبة عشان أبرد قلبي وعملت عمره لأمي وهديت خالص، وقلت إنا لله وإنا إليه راجعون، ده عمرها وانتهي لحد هنا".
وأوضحت مي تفاصيل حادث ابنتها وقالت: "إمبارح كنت شايلة فريدة مشيت بيها بالظبط متر من الريسيبشن للجنينة، كنت عاوزة أقعدها في الشمس، راحت أيد الكرسي مفكوكة ووقعت على الأرض، عشت أسود يوم في حياتي، كنت حاسة كأني مجرمة مذنبة، مش قادرة أوصف عامل إزاي، عينيا ما بتنشفش من الدموع، عندها كسر في عضمة الترقوة يا قلب أمك، طب دي هتستحمل إزاي، هنام إزاي الليل هيعدي علينا إزاي، بس ألف حمد وشكر لله، عدى الليل وربنا رحمته واسعة الحمد لله، قل لن يصيبنا إلا ما كتب الله لنا، ربنا يحفظ أولادنا، الضنا غالي قوي، الله يرحمك يا أمي ربنا يقوي كل الأمهات والأبهات على تربية ولادهم والحفاظ عليهم ربنا يقدرني ويحفظلي بنتي ويخفف عنها الألم بصتلي بصة إمبارح بالدنيا كلها كأنها بتتكلم وبتقول لا يا ماما ما تعيطيش أنا هابقي كويسة ربنا يحفظك يا نور عين ماما ربنا يرزق كل مشتاق".
يذكر أن مى كساب، توقفت الفترة الماضية عن نشاطها الفني بسبب ولادتها.
تابعوا آخر أهل مصر على Google News
