أمهات كثيرات لا يعرفن المعدلات الطبيعية لأطفالهن حديثي الولادة، سواء أوقات النوم، أودرجة الحرارة، مما يجعلهم يعتقدن بإصابتهم بأمراض ليس لها وجود، وهو ما يوضحه دكتور أحمد الخطيب إخصائى طب الأطفال وحديثى الولادة.
وقال الخطيب إنه من حيث إخراج البول: "حديث الولادة ممكن يعمل بول مرة كل ساعة بمعدل يصل إلى ٩إلى ١٢ مرة يوميًا، وممكن يعمل ٣ أو٤ مرات بس يوميًا ويكون هذا أمر طبيعى، بعد دخول الأكل وقلة الرضاعة العدد يقل طبعًا، لاحظى ان العدد ده ممكن يقل للنصف ويبقى مُركزّ ويسيب أثر Pink فى البامبرز فى حالات قلة الرضاعة أو سوائل الأم والحرارة والمرض والجفاف".
وتابع: "يكون القلق عندما يتغير لونه للأحمر، أو غامق مثل الشاي أو العرقسوس، أو في أي وجع أثناء التبول، أو لم يتم حمام بول خالص لمدة يوم كامل نكشف فورًا".
وأوضح الخطيب، أنه من حيث "البراز": "أول يومين ولادة بيكون أسود مخضر" فضلات الجنين"، بعد كده أصفر أو أصفر مخضر ومعاه حبيبات، ممكن يبقى أخضر مع قلة الرضاعة أو ادخال الأكل صعب الهضم، والقوام يكون طرى أو سايل أو سايل جدًا بينشف شوية مع الرضاعة الصناعى وإدخال الأكل، العدد ممكن يكون قليل لدرجة مرة كل أسبوع أو كتير لدرجة مرة كل رضعة، هيقل لـ 3 أو 4 مرات مع ادخال الأكل، ويوصل لمرة أو مرتين بعد السنة، ويكون القلق "لو فيه دم أو معرق بدم أو مخاط مستمر أو ناشف جداٌ أو معاه حزق مستمر أو أقل من 3 مرات فى الأسبوع أو مبيعملش إلا بلبوس ملين".
وبالنسبة للترجيع يقول الخطيب: "اللى على جانب الفم ده ومن غير مجهود او اندفاع ده اسمه ارتجاع سواء سايل أو مجبن "قشط"، وطبيعى طالما الطفل بيزيد في الوزن ومش معاه حزق مستمر أو تسلخات مزمنة أو إكزيما أو كحة وتزييق صدر متكررة (أعراض حساسية اللبن) وطالما مش أخضر ولا فيه دم، وبيختفى غالبًا على 6 أو 8 شهور، وعندما يكون باندفاع وقوة ده اسمه ترجيع ومحتاج كشف طبعًا".
ومن حيث درجة الحرارة فإنه "من 36.5 إلى 37.2 مقبول، لو زادت عن كده نحاول نقلل الهدوم والأغطية يمكن زيادة تغطية، لو لسه عالية 38 أو أكتر والطفل أقل من شهرين نكشف فورًا، لو فوق شهرين ندى باراسيتامول ونصبر يومين إلا لو الطفل مش Active أو الرضاعة ضعيفة أو في أى علامات مرض تانى "رشح - كحة- ترجيع- إسهال- إمساك".
تابعوا آخر أهل مصر على Google News
