تجتاح البلاد موجة من العواصف الترابية التى قد تسبب بعض الأذى للكبار والصغار على حد سواء، وحتى نتقى شرور تلك الموجات الترابية يقدم دكتور أحمد الخطيب أخصائى طب الأطفال وحديثى الولادة، بعض النصائح التى نشرها على حسابه الخاص بفيسبوك.
- ممنوع الخروجات كل أم تجمع عيالها وتخبيهم جوًا البيت حالًا، مافيش مدرسة ولا تمشية بره البيت.
- جوا البيت هنقفل الشبابيك والبلكونات كويس جدًا، وياريت نحط فوط أو ملايات مبلولة على فتحات الشبابيك أو البلكونات عشان ننقى الهوا من التراب.
- لو في طفل بيكح وطفل مش بيكح نوزعهم على الغرف، ونعالج بسرعه نزلات البرد، نلبس ماسكات لو في كحة ومضطرين نقعد في نفس الأوضه، مع التأكد أننا قافلين الشبابيك ومافيش مصدر تهوية كويس.
- تغير درجات الحرارة أكتر حاجة بتنتهزها الميكروبات عشان تنتعش فليس ضرورى الاستحمام دلوقتي، أقصى حاجة مياه دافية وفوطه واغسلي وش وعين وأنف طفلك عشان التراب ولو في حفاظات التغيير العادي كفاية اوي.
- السوايل الدافية هيا الحل السحري ماتوقفيش ينسون على كراوية على نعناع على تيليو، لتهدئة الصدر وطرد البلغم خاصة لو ابنك بيجيلو حساسية.
- لو في رشح ماتستنيش محلول ملح "لايس او اوتريفين" بسرعة كل ساعتين مع السوائل الدافية.
- اختاري الأكل الخفيف بلاش المسبك والحراق والفلفل الأسود والبهارات اللي ممكن تثير الجهاز التنفسي لطفلك وتخليه يكح.
- بلاش تتقِّلي أوي في اللبس لأطفالك وفجأة تخففي أول ما الموجه الترابية تخلص خير الأمور الوسط.
- لمرضى حساسية الأنف لو في رشح استخدمو "كلاريتين وبخاخات الكورتيزون" للأنف ومحلول الملح.
- حساسية الصدر: أدى جلسة موسع شعب "فاركولين) إذا لاحظتي على ابنك الأعراض التالية:
- كحة مستمرة
- نهجان شديد
- صوت صفير "تزييق" عالى
- ضيق النفس.
تابعوا آخر أهل مصر على Google News
