شهدت منطقة فيلل الجامعة، بمدينة الزقازيق بالشرقية، أمس الأول، مشهد أثار استياء وسخط الجميع، حيث تحرش عدد من الشباب بصورة جماعية، بفتاة، ترتدي فستانًا قصيرًا، وتم حجزها بأحد الكافيهات لحين وصول الشرطة لتحريرها منهم، والتي أطلقت 12 طلقة في الهواء لتفريق الشباب، وتم ضبط 6 منهم.
وعّلق العديد من الإعلاميين على الواقعة، وهاجموا مرتكبوها، وترصد "أهل مصر" ردود الأفعال حول هذه الواقعة..
عمرو أديبومن جانبه؛ أعرب الإعلامي عمرو أديب، عن استيائه من الواقعة، قائلًا: "أنا مش قادر أصدق الواقعة، انهيار جماعي للشباب بسبب إن بنت لابسة فستان قصير شوية، أومال لو لابسة هوت شورت مثلًا كنتوا عملتوا إيه؟، دي حالة سُعار جماعي”. وأضاف أديب، خلال تقديمه برنامج "كل يوم"، عبر فضائية “ON E”: "الشرطة جات تطلع البنت من القهوة اللي صاحبها آواها فيها، الشباب اتحرشوا بيها برضو، البنت وهي خارجة في إيد الشرطة بيمدوا إيدهم عليها، لحد ما الشرطة ضربت 12 طلقة في الجو عشان تفرقهم وتطلع ست الحسن والجمال”.وتابع: "إيه اللي جرا يا جماعة؟، إحنا جرالنا إيه؟، ليه يا جماعة كده؟، فين الأخلاق؟، فستان قصير يعمل كده؟، هو أنتوا عايشين في الصحراء؟، ده كل حاجة موجودة!، يرضي مين ده يا ناس؟، هو ده الشعب المتدين بطبعه، بنت لابسة فستان قصير وقفت بلد على رِجل، نفسي أعرف حصل إيه للناس”.
وائل الإبراشي
واستنكر الإعلامي وائل الإبراشي، مشاهد التحرش الجماعي بالفتاة، قائلًا إنها "لم تُرى من قبل إلا في ماتشات كرة القدم".
وأضاف الإبراشي، خلال برنامج "العاشرة مساء"، المذاع على قناة "دري": "قطيع من الذئاب يهجم على لحم، محدش من الشيوخ يطلع يلوم على لبس البنت والأوضاع الاقتصادية للشباب والتي تدفعهم لهذا الفعل".
تامر أمين
وقال الإعلامي تامر أمين، إنه أصيب بصدمة عقب رؤيته للفيديو، مستكملًا: "كنت فاكر اللمة دي بتاعت واحد بيوزع لحمه وفعلا طلعوا بيوزعوا لحمة البنت، الواحد هيخاف على نفسه في البلد دي".
وأضاف أمين، خلال برنامج "الحياة اليوم"، المذاع على قناة "الحياة": "طالما الشارع بالمنظر ده متسبوش بناتكم لوحدهم، لحد ما الناس تتربى، بعد كده الواحد مش هيخاف على بناته بس ده يخاف على نفسه كمان".
تابع: "التعليم والتربية والخطاب الديني مش نافعين، أنهي خطاب ديني يخلي شباب يستبيح عرض ست بالشكل ده ويتلموا حوالين بنت بالشكل ده والنهارده يصحوا الصبح يتوضوا وينزلوا يصلوا الجمعة عادي، صليتوا الجمعة النهارده وإنتوا لسه عاملين اغتصاب بالليل، متخيلين البنت اللي قعدت ساعة كاملة مستخبية في كافتريا من وحوش واقفين بره، البنت دي ممكن تنزل الشارع بعد كده؟".
أسامة كمال
وانتقد الإعلامى أسامة كمال، الشباب الذين قاموا بالواقعة، مؤكدًا أن الحادثة مؤسفة للغاية، قائلًا: “الناس مبقتش عاقلة ولا عارفة تربي عيالها اللي معندهومش دم ولا اتربت".
وأضاف خلال برنامجه "مساء DMC" المذاع على شاشة "DMC"، أن "العيب ليس على الأولاد الذين تحرشوا بالفتاة بل العيب على أهلهم لأنهم لم يؤدبوهم بشكل جيد".
سعيد حساسين
استنكر النائب سعيد حساسين، واقعة التحرش الجماعي بفتاة في الزقازيق، قائلًا: "إيه اللى حصل في البلد؟ ده لا دينا ولا أخلاقنا".
وأضاف حساسين، خلال برنامج "انفراد" المذاع عبر فضائية "العاصمة"، أن "الأولاد أخطأوا، وكذلك البنت، مستنكرا ملابس الفتاة، أنه لا يجب أن ترتدى فستانا قصيرا فى وقت متأخر ومكان مثل هذا".
تابع: "منتظرين إيه من شباب عندها 30 و40 سنة ومش لاقيين يتجوزوا"، مناشدًا الأباء والأمهات بحسن تربية أولادهم، قائلًا: "لا داعى للفتيات أن ترتدى ملابس ضيقة وقصيرة".
مفيدة شيحة
وهاجمت الإعلامية مفيدة شيحة، المتحرشون بفتاة الزقازيق، قائلةً: "ذئاب عديمي التربية والأخلاق، بهاجم الأمهات انتوا معرفتوش تربوا ولادكوا المتحرشين، أعلنوا عدم قدرتكم على تربية عيالكوا أنتي أم فاشلة وأب أفشل وعيلة مينفعش حد يتجوز منها، كان لازم تربي يعني إيه رجولة ونخوة ودين وأخلاق".
وأضافت شيحة، في برنامج "الستات مايعرفوش يكدبوا"، المذاع على قناة "CBC": “ الغريب أن كان في بهوات بتصور ومدخلتش لإنقاذ البنت"، موجهةً حديثها للمتحرشين: "أنتوا لا تصلحوا تكونوا رجال.. أنتوا عيال سيس".
إيمان الحصري
وهاجمت الإعلامية إيمان الحصري، المتحرشون بالفتاة، لافتةً إلى أن صاحب "كافيه" مجاور هو من أنقذها.
أضافت الحصري، خلال تقديمها برنامج "مساء DMC" المذاع على شاشة "DMC"، أن "حفلة أُقيمت على الفتاة في الشارع"، موضحةً أن موضوع التحرش في مصر أصبح ظاهرة فجّة.
أميرة بدر
قالت الإعلامية أميرة بدر، إن ملابس الفتاة ليست مبرر للتحرش بها جماعيًا، موضحةً أن "الواقعة تؤكد أن الشارع المصري وصل لمنحدر رهيب جدًا".
أضافت بدر، خلال تقديمها برنامج "أنا والناس"، عبر فضائية "الحياة 2”: “الرجالة اللي واقفين يتفرجوا على البنت ما شاء الله عليهم، في وسط الرجالة دول كلهم مفيش راجل يحميها؟ دي بنت عادية ومش رقاصة وعندها 19 سنة".
تابعت: “يعني هما حيوانات عشان يمشوا ورا الغريزة؟ الرجالة بقت قليلة الرباية، ده شيء مُشين جدًا وخطير للغاية، والمخدرات هتعمل فينا أكتر من كده".
دينا يحيى
قالت الإعلامية دينا يحيى، تعليقاً على واقعة التحرش، إن "مجتمعنا يفتقد إلى معاني النخوة والرجولة معلقين على شماعة أن لبسها غير لائق".
أضافت يحيى، خلال برنامج "90 دقيقة"، المذاع على قناة "المحور": "لو هنتكلم بصراحة اللبس مفيهوش حاجة فين لبسها القصير دا وأن كل من تحرش بهذه الفتاة هو شخص انعدم منه معاني الرجولة والشهامة".
تابعوا آخر أهل مصر على Google News
