معركة جديدة بدأت بين الشباب والفتيات على مواقع التواصل الاجتماعى، حول وضع معايير محددة لاختيار شريك الحياة من الطرفين، فبعد الدعوات الذكورية التى أطلقها الشباب بشكل ساخر لتشجيع الفتيات على اختيار الشاب "النسوانجى" كزوج مثالى، أطلقت الفتيات دعوات مضادة تنادى باختيار الفتاة "بتاعت الرجالة" والتى لها علاقات سابقة مع الشباب، للزواج منها.
وقدمت الدعوات على سبيل المزاح 7 مميزات لاختيار الفتاة "بتاعت الرجالة"(المعادلة لكلمة "نسوانجى" للشباب)، كما حددتها المدونة أسماء زاهر بشكل ساخر كالتالى:
1- هتعرف ازاى تسعدك لأنها تعاملت مع أولاد كتير غيرك.
2- هتوديك أماكن جديدة انت متعرفهاش عشان لفت كتير.
3- طالما قررت تتجوزك يبقى حبتك بجد وقررت تستقر وتكتفى بيك.
4- كفاية انها سابت الرجالة الحلوة اللى قبلك واختارتك.
5- بتعرف تتكلم وتقول كلام حلو وأشعار لأنها خبرة فى الموضوع ده.
6- أكيد هيكون فيها مميزات وكاريزما وحاجات حلوة كتير عشان كده حبتها.
7- وأهم سبب.. لما بتقرر تتجوز بتكون فعلا مقتنعة وعايزة تستقر ووصلت لمرحلة اكتفاء، يعنى هتخدها كده شبعانه من الدنيا أحسن ما تاخد واحدة ملفتش كتير نفسها تتفتح بعد الجواز وتخونك.
واختتمت المدونة منشورها، قائلة: "الكلام ده طبعا مش هيعجب حد، بس ليه مطلوب إن البنت تتقبل ماضى الولد، لكن العكس مايحصلش؟ البوست ده موجود منه النسخة الرجالى والموضوع هزار ولطيف بس للأسف فى بنات مقتنعة بالكلام ده، وإن الأهل بيفرحوا أوى بابنهم إنه كبر وبقى "نسوانجى"، لكن لو البنت بس بصت لولد بيطلع عينها".
وتابعت: "كفاية أحكام على أى إنسان.. يا ريت نتعامل مع بعض والماضى يتنسى.. ولو حصل وحبيت حد اتأكد إنه يخدك بعيوبك وماضيك.. والكلام للجنسين".
تابعوا آخر أهل مصر على Google News
