نشرت مواطنة تدعى "دارين عصام"، عبر حسابها الشخصي "فيس بوك" أمس الخميس، واقعة إصابة ابنها بكسر في الجمجمة بإحدى الحضانات المشهورة، نتيجة والإهمال المتعمد.
وذكرت "دارين": "كنت عايزة أحكي حاجة حصلت لابني وأنا مش عايزة حاجة غير كل أب وأم لما يدوروا على حضانة مناسبة وبيدفعوا مبالغ طائلة في سبيل راحتهم ميدوروش بس على أكل وتعليم ومكان شيك الأهم أن المسئولين اللى فيها يأخذ القرار الصح فى الوقت الصح أنا ماليش أي مصلحه غير إنكوا تدعوا لابني بالشفاء".
وأضافت دارين: "أنا ابني اتخبط في الحضانة وطبيعي أنه يتخبط وده طبيعي المشكلة إن الحضانة ماهتمتش جابت دكتور أطفال اللى هو الولد مش عنده برد يعنى، بعد ساعة ونص من الخبطة الدكتور وصل ويكلموني ويقولوا الخبطة بسيطة ومتجيش والدكتور يطمني ويقولي عادي ويعيش حياة طبيعية من بكرة وكتبلى فى الروشتة هيموكلار وسيتال زى ما باين فى الصورة، تخيلوا لو كان ابني عاش حياته عادي وراح تمارينه واتخبط تانى إيه اللى كان ممكن يحصل بسبب إهمال دكتور مبيفهمش وحضانه جايبه حد مش كفء".
وتابعت حديثها: "استهتروا بخبطة فى مكان حساس زى ده والاستهتار الأكبر إن بعدها أكلمهم محدش بيرد عليا رغم إني قولت للدكتور أخده نعمل أشعة، ورحت أجيب ابني لقيت راسه وارمة زي الصورة الأولى.. جريت على المستشفى وفى الطوارئ قالوا لازم أشعة مقطعية بسرعة وطلع عنده كسر في الجمجمة ولازم يفضل فى الرعاية المركزة ٢٤ ساعة والحمد الله أن محصلش نزيف والصورة الثالثه دى بعد ما أخدته بساعة وبعد ماعرفنا التشخيص الصح".
واكملت "دارين" قائلة: "ده غير إنهم كذبوا عليا فى تفاصيل الخبطة اللى اكتشفتها من الفيديو اللى عندهم وان مفيش حد كان واقف غير مشرفة واحدة على أكتر من ١٠ أطفال، أنا غلطانة إني مروحتش ووثقت في كلامهم وكلام الدكتور بس بحذر كل أم وأب ولادنا أمانة لازم نحافظ عليها ولو هانسبهم نتأكد أن المكان ده مؤهل كويس وأنهم يكونوا بني آدمين لأن اللي عملوه محدش يصدقه غلطتي إني وثقت في مكان افتكرت أنه قد السمعة اللى واخدها ومن أكبر الحضانات في مصر، بس ممكن تكون سبب في ضياع أطفالنا ربنا يحفظ ولادنا من شر الإهمال واللامبالة".
تابعوا آخر أهل مصر على Google News
