في محاولة للوقوف على هموم المواطنين ومطالبهم، تجولت كاميرا "أهل مصر" بمنطقة صفط اللبن لتسألهم "ماذا تريدون من نوابكم الممثلين لكم بالبرلمان"؟.
وتباينت هموم المواطنين منهم من تحدث مشكلة استمرار غلاء الأسعار، وآخرين تناولوا افتقاد الخدمات الصحية، وفريق ثالث استنكر تدهور العملية التعليمية بالمدارس.
فقال أحد المواطنين: "نطالب بالإهتمام بالمدارس، الفصل فيه 60 طالب مش لاقيين أماكن يقعدوا عليها، وإحنا مش بنشوف النائب عن دايرتنا غير وقت الانتخابات، بنطلب منه إيجاد حل لأولادنا في المدارس".
وأضاف آخر: "الخدمات الصحية متدنية لما حد بيروح الوحدة الصحية ولا المستشفى بيكتبوا للكل نفس الدواء "أسبرين" وبطلب من النائب يشوف الخدمات الصحية ويهتم بيها عشان احنا تعبنا".
فيما تساءلت مواطنة أخرى: "فين نواب البرلمان ييجوا يشوفوا لما جل في فلوس الدروس الدرس الواحد ب300 جنيه والمدرس بيقول للطالب لو ماخدتش درس هتسقط"؟.
وزاد آخر قائلًا: "الشوارع كلها مكسرة وكنا دافعين فلوس البلاط مع الغاز ولحاد دلوقتي ماتعملش البلاط، وكمان ماعندناش كشافين كهرباء ييجوا ياخدوا قراءة العدادات، إحنا بنطالب النواب نشوفهم دلوقتي زي ما كنا بنشوفهم أيام الانتخابات ويشوفوا مشاكلنا إحنا انتخبناهم لثقتنا فيهم وهم لحاد دلوقتي مانفذوش وعود".
تابعوا آخر أهل مصر على Google News
