تداول عدد من نشطاء التواصل الاجتماعي "فيس بوك"، صورًا تجمع نجم الكرة المصرية "الملقب بأسطورتها" محمد صلاح، والفنان محمد رمضان، الملقب بأسطورة الفن، وقارنوا بينهما في الأدوار التي لعبها كلًا منهما في تمثيل صورة الأسطورة، وإبراز ماتم تداوله علي صفحات السوشيال ميديا منذ انطلاق رحلة الشهرة لكلا النجمين.
وقارن أحد متابعي صفحة الفنان محمد رمضان الشخصية، علي موقع التواصل الاجتماعي" فيس بوك" وبين لاعب منتخب مصر ونادي ليفربول الانجليزي محمد صلاح، قائلًا: "محمد اللى ع الشمال بدأ زيه زى أى حد عنده طموح انه ينجح فى مجاله.. اشترك فى اعمال مسرحية مع الفنان الكبير الراحل سعيد صالح واعمال تليفزيونية وسينمائية زى مسلسل" أولاد الشوارع والسندريلا وتجسيده (بعبقرية) لشخصية أحمد زكى".
وتابع: "لقى ان الجد والقيمه مش جايبين همهم فقرر يبيع (الهوا فى ازايز).. اتجه لأفلام الهلس والبلطجة بمساعدة من (محمد بيه السبكى باشا واخوة).. جيل بالكامل بقى شايف نفسه الواد (الألمانى) اللى ممكن يشيل (فرد) عبده موتة.. ويحلق حلقة (قلب الأسد).. تدمير افكار وغسل عقول على طريقة (اذا اردت النجاح.. تاجر فى السلاح).. سمى نفسه (الأسطوره) نسبة لمسلسل شايل نفس الأسم ونفس الأفكار (المسمومة).. محمد كبر وكبرت جماهيريتة وزادت ثروته.. وزاد معاهم غروره وتصريحاته المسيئة لفنانين سابقين وحاليين (ما علينا أهم زمايل فى بعض).. موقفش عند الفنانين.. بدأ يهاجم فى الغلابة اللى ملاقوش مكان فى بلدهم (وبمزاجهم أو غصب عنهم) اخدو خطوة الهجرة الغير شرعية واتهمهم بقلة الأصل (حقه.. ما هو اسطوره بقى) !!!".
مسيرة نجم
وأضاف: "محمد اللى ع اليمين بدأ لعب الكوره مع اصحابه فى الشارع فى طنطا.. أبوه شاف فيه لاعيب كويس.. قدمله فى اختبارات نادى (المقاولين العرب) وعشان الولد حريف وييجى منه نجح فى الاختبارات.. والده بقى ياخدو كل يوم من طنطا للقاهره عشان التمرين.. وفى يوم وهو بيلعب فى منتخب الناشئين اتعرض على نادى الزمالك اللى رفضه بحجة (ان طريقة لعبه متناسبش الفريق الابيض).. بس محمد ميأسش.. كمل فى نادى المقاولين ولعب للفريق الأول.. وتألق وبقى نجم الفريق وواحد من الشباب الصاعدين فى مصر.. احترف فى الدورى السويسرى (الضعيف) مقارنة بالدوريات الأوروبيه وفى الفتره دى بقى نجم المنتخب المصرى مع زميله السابق أمير القلوب (محمد ابو تريكه).. اتنقل نقلة كبيرة فى صفقة كانت تاريخية لما انضم لصفوف (تشيلسى الانجليزى) لكن كانت (الخبطة التانية).. مدربه (مورينيو) معتمدش عليه، وقعد سنة تقريبا احتياطى فقرر محمد يتنقل لفيرونتينا الايطالى ومنه لروما اللى حقق معاه اقوى النتايج والأرقام واستقر حاليآ فى ليفربول أحد أكبر أندية العالم.. وهو شخصيآ بقى واحد من أهم اللاعبين على مستوى العالم، وقدر يوصل بمنتخب بلده لكاس لعالم بعد غياب 28 سنة، ورغم كل النجاح ده محمد فضل محتفظ بتواضعه وأدبه وشخصيته الطيبة وقلبه الأبيض ومعدنه الأصيل وابتسامته الصافيه اللى على طوول ماليه ملامحه".
واكتفى متابع آخر لصفحة الفنان محمد رمضان الشخصية، بوضع صورة تجمع النجمين يظهر فيها محمد صلاح يصافح أحد الفقراء، بينما في الصورة المقابلة يظهر محمد رمضان يرتدي نظارة وبنطلون جنيز وحذاء فارة، وخلفه طائرة نقل خاصة، وعلق عليها قائلًا: "الصورة دي فيها معني كلمة شبع من بعد جوع " ومعني من تواضع لله رفعه".
تابعوا آخر أهل مصر على Google News
