بعد عرض فيلم “كنغر حبنا” بطولة رامز جلال وسارة سلامة، على الإنترنت، هاجم الفنان محمد إمام، قراصنة الأفلام السينمائية.
وقال عبر صفحته الشخصية على "فيس بوك": "ليه فى عقلية بتفكر بالطريقة دى، وليه فى ناس مركزة فى موضوع إنها تسرق الأفلام ومجهود ناس تانية وتنزلها على النت بالرغم إن القانون بيمنع ده، بجد بيستفيدوا إيه؟ على فكرة إحنا كل حياتنا وطاقتنا ومجهودنا رايحين فى إن إحنا نعمل حاجات تبسطكم وتستمتعوا بيها".
وأضاف: "الصناعة دى فاتحة بيوت ناس كتيرة جدًا، الفيلم الواحد بيشتغل فيه حوالى من ٥٠٠ إلى ٧٠٠ شخص، ده غير الضرايب الكتيرة اللى بتدخل للدولة من ورا أى عمل سينمائى وكمان فلوس تصاريح التصوير فى أى مكان فى البلد، غير النقابات.. صناعة السينما من أهم مصادر الدخل القومى للبلد والوحيدة اللى واقفة على رجليها رغم ظروف البلد الاقتصاديه، ومن غير أى دعم من الدولة نفسها”.
وتابع: "الفيلم الناجح مش المنتج بس والسينمات اللى بيكسبوا منه، لا ده كمان المحلات ومطاعم الأكل اللى جنب السينمات والمواصلات والتكاسى اللى بتوصل الناس للسينما وناس تانية كتير بتسترزق بسبب فيلم، نجاح الأفلام بيبقى حالة عامة بتعم على الكل.. أرجوكم ماتبوظوش الصناعة دى كمان".
تابعوا آخر أهل مصر على Google News
