هنأ السيناريست تامر حبيب الكابتن محمود الخطيب، على فوزه بانتخابات القلعة الحمراء، حيث نشر صورة للخطيب عبر صفحته الشخصية على موقع الصور الشهير "انستجرام" وعلق عليها قائلا: "نا عمري ما كان ليا في الكورة ولا بأفهم فيها بالمرة، بس اخترت من صغري لما يسألوني أنا أهلاوي ولا زملكاوي، إني أكون أهلاوي، وعشان أسباب مالهاش أي علاقة بالكورة، أولًا لأن صالح سليم بطل فيلم الشموع السوداء أهلاوي، ثانيا لأني كنت باروح النادي الأهلي زمان مع أهلي وصحابي اللي كانوا بيلعبوا كورة هناك، ثالثا لأني أحب اللون الأحمر، رابعًا لأن الأهلي طول عمره كان بيكسب أكتر من الزمالك".
وأضاف: "وعمري ما كنت أعرف من لعيبة الكورة إلا اللي مثلوا في السينما أو عملوا إعلانات أو اتجوزوا فنانات، وعمري في حياتي ما شفت لاعب كرة وحبيت أتصور معاه ولا أفضل مراقبه ومنصت ليه في أي حاجة بيقولها حتى لو بيتكلم في الكورة اللي أنا ثور لاهي في برسيمه فيها، ولا عمري كنت سعيد ومبهور بلاعب كرة إلا أمام هذا الرجل، طول عمري من صغري إلى الآن بافرح وأنا باشوفه في أي حاجة، بكيت في ماتش اعتزاله وهو بيقول: ألف شكر، عمري ما سمعت حد عرفه واتكلم عنه كلام غير حميد ووصفه بأنبل الصفات.. محمود الخطيب مش نجم كورة، محمود الخطيب نجم في كل حاجة.. مبروك للنادي الأهلي رئيسه المناسب، المشرف، الخلوق".
تابعوا آخر أهل مصر على Google News
