نشرت الفنانة إيناس عز الدين، عبر موقع التواصل الاجتماعي فيس بوك، صوره لها مجمعة في ثلاث مراحل حياتيه مختلفة، لتظهر المراحل التي مرت بها أثناء رحلتها مع خسارة الوزن بعد خضوعها لعملية نحت للجسم.
وأضافت الفنانة، أن فترة مرضها كانت من أهم مراحل حياتها لأنها اكتشفت قوتها وإصرارها وعزيمتها، وكشفت نجمة برنامج "أرب آيدول" عن تحضيرها لمفاجآت كثيرة لن يتوقعها محبوها.
جاء نص ما نشرته "كل مرحلة في المراحل دي كان عندي ثقة بنفسي ورضا وكنت بحب نفسي فيها ومؤمنة بإن جوهري ومضموني أهم بكتير من شكلي الخارجي ومع ذلك كنت شايفة نفسي حلوة في كل وقت، وكل مرحلة اتعلمت فيها حاجات جديدة واكتشفت في نفسي حاجات كتير ما كنتش أعرفها عن نفسي".
وتابعت، "كنت بريئة أوي لدرجة إني كنت بتصدم كتير وأتوجع اكتر من كل اللي حواليا من كتر عشمي فيهم ما كنتش لسه اصطدمت بشكل كافي بقذارة الحياة، كانت رحلة طويلة من المرض والالم الجسدي والنفسي بسبب صدماتي الكتير في الحياة وفي الناس لما بدأت تظهر حقايقهم واعرف مين بجد عدوي من حبيبي وقت الشدة والمرض والالم والمعاناة والاستسلام وكمان المرحلة دي كانت اهم نقلة في حياتي".
واستكملت، "اتولدت إنسانة جديدة خالص فيها طباع كتير من القديمة بس اكتسبت طباع جديدة منها العند والقوة المفرطة والتحدي والأمل في نفسي وفي الحياة اكتشفت اني لازم احب نفسي لانها تستاهل انها تتحب ومش هتعب ولا اتألم تاني وهتعالج صح وهبدا اهتم بصحتي بعد ما اهملتها بجد واتعرضت للموت كتير بسبب اهمالي واني دلوقتي عندي طموح وتحديات ما ينفعش استسلم قدامها ولازم اخوضها وعلى ثقة اني قدها وهنجح فيها وعلى يقين من ده".
واختتمت، "بس الأكيد إن المرحلة اللي في النص كانت اهم مرحلة في حياتي لأنها هي اللي صنعت واكتشفت إيناس القوية الصلبة اللي مش بتتكسر بسهولة وتقدر تكسر بلد بحالها ومنها اتولدت ايناس بتاعة النهاردة اللي كلها اصرار وعزيمة وتحدي وقوة واللي هتبقى زي القطر هتدوس على اي انسان يحاول يقف في طريق نجاحها واصرارها او يكسرها او يقلل منها ومش هتسمح زي زمان بالمؤامرات اللي بتتعمل ضدها والحاجات اللي كانت بتحصل زمان من حواليا وانا بقف مستسلمة، خلاص مافيش استسلام والجاي احلى واقوى علشاني وعلشان خاطر كل انسان حبني وشجعني وآمن بيا وكان معايا على المرة قبل الحلوة وبقولكم دلوقتي خلاص المُر راح واللي جاي كله حلو واحلى واحلى، ومحضرالكم مفاجآت كتير ما تتوقعوهاش😉، #فخورة_بكل_مرحلة_مريت_بيها".
تابعوا آخر أهل مصر على Google News
