معتز عبد الفتاح: "أبو الفتوح" قال الكلام الخطأ في المكان والوقت الخطأ

علّق الدكتور معتز عبد الفتاح، أستاذ العلوم السياسية، على قرار محكمة جنايات جنوب القاهرة، الثلاثاء، إدراج عبدالمنعم أبو الفتوح، رئيس حزب مصر القوية والمرشح الرئاسي السابق و15 آخرين في قوائم الإرهابيين بناء على المذكرة المقدمة من النائب العام؛ قائلًا: "تواجد في المكان الخطأ عبر قناة خطأ في التوقيت الخطأ ليقول الكلام الخطأ".

أضاف عبد الفتاح، خلال تقديمه برنامج "الطريق إلى الاتحادية"، المُذاع عبر فضائية "أون لايف"، مساء الثلاثاء، "البعض مش عايز يقتنع إننا في مرحلة جديدة، الحكم صفّر يا جماعة على الماضي وبدأنا ماتش جديد بقواعد جديدة، واللي يقدر يساعد فيها يساعد، لكن مايكونش منطقها اللي يقدر يخرق المركب أكتر".

تابع أستاذ العلوم السياسية، "البلد بتدور على اللي يبني ويعمر ويقودها في سكة الأمان، مش اللي يردها لورا ويخلينا نطرح أسئلة الماضي التي ليس لها إجابة وتُعكر، محدش هيغير مسار البلد، البلد عارفة هي رايحة فين، كنا رايحيين ناحية الشلالات وربنا أكرمنا وبعدنا وبنبعد أكتر ، ورايحين المنطقة الآمنة وبنبي بلدنا".

واصل: "أي كلام في الماضي ليس له معنى، وكذلك أي تشكيك في المؤسسات والقيادة، اللي عايز ينزل انتخابات ينزل، واللي عايز يشارك ينزل، واللي مش عايز براحته، لكن في النهاية محدش هيفرض رأيه على جموع الناس".