فصل الشتا يمكن بيخلي كتير من البنات يهملوا العناية بجسمهم وبشرتهم, يعني في الشتا ممكن الوزن يزيد شوية, البشرة تبقى جافة بسبب الجو, ولما بيجي الصيف مش بنبقى مستعدين لاستقباله, عشان كده النهاردة هنقول لكل بنات حوا نصايح جمالية للجسم والبشرة تخليكي مستعدة لاستقبال موسم الصيف.
1- بشرة الوش:
الوش في موسم الشتا بيتأثر اكتر بعوامل الجو والبرد, عشان كده مع بداية الصيف بتكوني محتاجة انك تعتني ببشرتك عشان تتخلصي من اثار الشتا السلبية عليها, وعشان ده يحصل انسي استخدام المقشرات المكثفة اللي ممكن تضر البشرة اكتر وهي بالفعل مش صحية, الافضل انك تستبدلي ده بمستحضرات طبيعية لتنضيف البشرة, ممكن للبشرة الدهنية تستخدمي مغلي البقدونس, او اكليل الجبل “الروز ماري” للتنضيف, ولو بشرتك جافة هيكون افضل ليكي تستخدمي مغلي البابونج.
2- بشرة الجسم:
درجات الحرارة المنخفضة واستخدام الدفايات في الشتا بتخلي بشرة الجسم تجف, عشان كده لازم تتأكدي انك بترطبي بشرتك كويس عشان تبقى ناعمة وصحية, ولو مافيش منتج مرطب معين بتستخدميه, بننصحك باستخدام زيت جوز الهند يعتبر مرطب طبيعي رائع جدا.
3- منطقة البكيني:
كتير من البنات بيستسهلوا وبيستخدموا مكنة الحلاقة لازالة الشعر من منطقة البكيني لكن للاسف الطريقة دي ليها سلبيات على البشرة لانها ممكن تسبب حكة في المنطقة دي لما الشعر يبدأ يظهر تاني, وكمان لو انتي شعرك كثيف وغامق هتسبب لك نقط غامقة في المنطقة بعد الحلاقة, عشان كده افضل اختيار لازالة الشعر من منطقة البكيني هي الشمع, ممكن تستخدميه مرة واحدة كل شهر او شهرين على حسب سرعة نمو الشعر عندك, وعشان تتجنبي الجفاف في المنطقة بعد ازالة الشعر بالشمع ببنصحك بعمل تقشير مرتين على الاقل في الاسبوع.
وعشان تتخلصي من الغمقان في منطقة البكيني ضروري جدا ترطبي المنطقة دايما بعد الشاور, وممكن تستخدمي المنتجات او الوصفات الطبيعية اللي بتقلل ظهور الشعر في المنطقة دي عشان تسهل عليكي التعامل معاها.
4- تحت الابطين:
لو عايزة تعملي تفتيح لمنطقة تحت الابطين وفي نفس الوقت تقللي نمو الشعر في المنطقة دي, ممكن تجربي كريم التبييض ده بمكونات طبيعية كلها من البيت
وهو عبارة عن 2 معلقة صغيرة كركم, 1 معلقة صغيرة كربوناتو, 3 معالق صغيرة عسل نحل, عصير ½ ليمونة, امزجي المكونات مع بعض لحد ما تتكون عندك عجينة سميكة, نضفي منطقة تحت الابطين كويس, ادهنيها بالخليط وسيبيه لمدة 20 دقيقة لحد ما ينشف, بعدها اغسليه بالمية ورطبي البشرة.
5- بطن فلات:
واحد من اكتر التمارين الفعالة لمنطقة البطن هو تمرين Ball exchange او تبادل الكرة, نامي على ضهرك وافردي الساقين بشكل مستقيم, حطي الذراعين فوق راسك, امسكي الكورة فوق راسك, وبعدين امسكيها فوق منطقة الصدر, وبعدها امسكي الكورة بين رجليكي, ورجعيها للارض, وحافظي على الساقين بشكل مستقيم.
كرري التمرين من 10 – 12 مرة, واثناء التمرين حافظي على منطقة اسفل الضهر انها تكون ضاغطة على الارض وانتي بتعملي تبادل للكورة.
البوكسينج كمان يعتبر طريقة فعالة جدا لتنحيف الوسط, ممكن تضيفيه لروتين الكارديو اليومي بتاعك.
6- الترهلات:
عشان تتخلصي من الترهلات حوالين منطقة الوسط والجناب ممكن تعملي التمارين البسيطة دي في البيت.
– التمرين الاول:
نامي على ضهرك, ارفعي الذراعين لفوق في الهوا, اتني الركبتين بزاوية 90 درجة, خلي الايد الشمال ورا راسك مع فرد الرجل اليمين في نفس الوقت ولكن من غير ما تلمس الارض, ارجعي للوضع الاول واعملي نفس التمرين للجنب التاني, كرري التمرين 10 مرات لكل جنب.
– التمرين التاني:
نامي على ضهرك, اتني الركبتين لحد منطقة الصدر, وايديكي ورا راسك, اضغطي بالركبة اليمين ناحية الصدر مع فرد الرجل الشمال بالتوازي مع الارض, ولفي بكتفك الشمال ناحية ركبتك لفي بالكتف ناحية الركبة مرتين, وبعدين ارجعي للوضع الاول, كرري التمرين 20 مرة لكل جنب.
7- المؤخرة:
منطقة المؤخرة فيها اكبر مجموعة عضلات في الجسم كله, والتمارين للعضلات دي مش بس هيخلي شكل المؤخرة مثالي كمان هيساعدك على فقدان الوزن بشكل اسرع, ويعتبر تمرين السكوات من ابسط التمارين واكترها فاعلية للمنطقة دي.
8- النظام الغذائي:
مع التمارين اكيد مهم جدا تمشي على نظام غذائي صحي عشان توصلي لجسم مثالي بشكل اسرع, اتأكدي من شرب كمية مية كافية يوميا, دخلي في نظامك مدرات البول الطبيعية زي الخيار والليمون والشاي الاخضر, حاولي تقللي نسبة الكربوهيدرات المعالجة زي الخبز والمكرونة.
تابعوا آخر أهل مصر على Google News
