مى عز الدين تهاجم MBC بسبب «وعد»

أعربت الفنانة مي عز الدين عن استياءها لعرض مسلسلها وعد عبر شاشة "ام بى سى مصر 2"، وذلك في بيان نشرته عبر صفحتها الخاصة على الفيس بوك منذ قليل.

وكتبت "عز الدين": "طيب أنا قضيت اليومين اللي فاتو بحاول أطالب إدارة قنوات Mbc مصر بزيادة إعادات المسلسل وعرضه علي قناة Mbc مصر كمان لأنه بيتعرض على Mbc مصر 2 فقط، ودي ناس كتير مكانتش تعرفها ولا منزلاها وهو المسلسل الوحيد اللي من إنتاج شركة تابعة ليهم، وبالتالي كان من المنتظر الاهتمام بعرضه على قنواتهم الإثنين، ومع ذلك مش راضيين يخلوه بيتعرض على القناتين بتوع Mbc مصر وسايبينه على Mbc مصر 2 بس".

وأضافت "مي" في بيانها: "و في الآخر الرسالة الوحيدة اللي وصلتني إن ده مقصود علشان دي الفرصة إن القناة تتعرف ! يعني انا كده مطلوب مني أقوم قناة لوحدي ! تمام وانا بقول لmbc قبلت المسؤولية وبإذن الله ربنا يكرم والقناة والمسلسل يتشافو والحمدلله فيه علامات باينة من كم الإعلانات اللي جه من بعد اول حلقة للمسلسل وغيره وانا هعتبره إمتحان ليا يعرفني قدري عند الناس وهل فعلا بيحبو مسلسلاتي أو لا ونسبة الجماهيرية اللي وصلتها ايه مع اني مهما كان ليا جمهور اكيد كنت اتمني اني اتشاف من الناس اللي مش من جمهوري لأن ساعات بتكون كا مشاهد ملكش في ممثل لكن لو قابلت حلقة لمسلسله بالصدفه وعجبتك بتقرر تتابعه وده في الاخر بيبقي خلاني كسبت مشاهد جديد بقي بيحب يتفرج علي اعمالي وده طبعا مش هيحصل السنة دي لأن مفيش حد بيبقي معدي وبيشوف القناه دي بالصدفة الناس لسه اصلا بتتعرف علي طريقها من خلالنا وبينزلوها... لكن قدر الله وما شاء فعل".

ووجهت "مي" رسالة لجمهورها: " وبالتالي عندي طلبين اولا بطلب من جمهوري وروابط الفانز بتاعتي تساعدني في نشر تردد القناه لكل الناس اللي مش عارفة تجيبها وبطلب من صحافتنا تشهد انا بدأت رمضان بقناة كم الناس اللي عارفها قد ايه وصفحتها حتي على الفيسبوك فيها كام وبعد رمضان تقولولي بأمانة هل قدرت فعلا في ظل الظروف دي أنجح ولا لأ، ومتابعة نسبة مشاهدة القناة علي اخر رمضان هتكون وصلت لأيه ومشاهدة المسلسل علي موقع شاهد دوت نت وصلت لأيه لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة والجمهور ساعتها تعويض يكفيني".