_ كان التنسيق بين وزارة الداخلية ووزارة الدفاع يجرى على قدمً وساق من أجل تجهيز مأمورية سرية على أعلى مستوى أطلق عليها ( مأمورية الفجر ) والقيام بها دون تأجيل، لكن فوجيء الجميع بإتصال من النائب العام المستشار هشام بركات أكد خلاله أنه يصر على ضرورة استكمال باقى التحقيقات مع المتهم الذى إعترف بمكان وجود ( المخاوى ) بعد أن رأى النائب العام أن قصة وجود المخاوى فى مغارة فى القطامية جملة مطاطة ولابد من تحديد المكان بالضبط، كانت الخطة الأمنية أيضًا قد لفتت النظر إلى هذه النقطة لكن تم تجاهلها بعد ورود معلومات من جهاز الأمن الوطنى تفيد بوجود عدد من المغارات في القطامية وطريق القطامية من إتجاه السويس، المهم تم فتح التحقيق مرة أخرى مع المتهم.
_ وكيل النيابة: انت قلت أن ( المخاوى ) موجود فى مغارة فى القطامية، فين تحديدًا ؟
_ المتهم: أيوا يا حضرة المستشار مغارة فى القطامية، يعنى بعد ماتمشى كدا بشوية من ناحية التجمع، يعنى فيه طريق كدا بتمشيه وإنت رايح جسر السويس !!
_ وكيل النيابة: ازاى قطامية وتجمع وجسر السويس،،، ما ينفعش ؟
،،،، وفجأة، ( قام وكيل النيابة بطلب خريطة تفصيلية لمصر، وفى دقايق معدودة كانت أمامه على مكتبه )
_ المتهم: أيوا يا حضرة المستشار جسر السويس
_ وكيل النيابة: ايه اللى جاب جسر السويس هوه انت كنت بتروح له عن طريق ( المترو ) ؟
_ المتهم: لا،،، بس جسر السويس دا طريق معروف
_ وكيل النيابة ( ينظر فى الخريطة ويدقق النظر فيها ): قصدك بقى طريق السويس مش جسر السويس
_ المتهم: أيوا يا فنددددددددددم طريق السويس دا معروف خالص الطريق دا
_ وكيل النيابة ( يدقق النظر فى الخريطة ): كلامك كدا صح،، يبقى انت تقصد المغارة اللى فى طريق القطامية من اتجاه طريق السويس، لانها فعلا امتداد للطريق. طب تعرف فين تحديدًا ؟
_ المتهم: اللى بعرفه بقولهولك، واللى بفتكره بقولهولك أهو، أه انا افتكرت أهو المنطقة دى اسمها ( جلال )
_ وكيل النيابة ( يقف ويدقق النظر فى الخريطة ): الله،، هيه منطقة ولا جبل،، إفتكر ؟
_ المتهم: جبل يا حضرة المستشار طبعا، مرة قالوا لى اننا فى القطامية ومرة تانية قالوا لى اننا فى امتداد القطامية ومرة كمان قالوا لى اننا فى طريق السويس ومرة كمان واللاهى العظيم قالوا لى اننا فى جبل جلال.
_ وكيل النيابة ( مازال واقفًا ويدقق النظر فى الخريطة وفى يده قلم رصاص ): أيوا،، القطامية أهى،، وطريق القطامية أهو من إتجاه طريق السويس وفين جبل جلال دا ؟ أيوا آدى جبل أهو،، بس دا اسمه ( جبل الجلالة ) ؟
_ المتهم ( يبكى ويقول ): أيوا يا حضرة المستشار،، ( جبل الجلالة )،، إلحق يا حضرة المستشار، ( المخاوى ) موجود هناك يا فندم، موجود فى ( مغارة فى جبل الجلالة اللى فى طريق السويس )،، إلحق مصر يا فندم، هايفجروها ويولعوها ويحرقوها وبيقولوا إنهم ( هايطربقوها ) على دماغ المصريين.
_ وكيل النيابة ( يتصل تليفونيًا بمدير نيابة امن الدولة العليا ) ويبلغه بمكان وجود ( المخاوى ) بالضبط، وكانت الجملة الشهيرة: يا فندم المخاوى موجود فى ( مغارة فى جبل الجلالة فى طريق السويس )، وسريعًا جدًا كانت الأجهزة الأمنية قد علمت بالمكان وتم التأكيد على التنسيق وزارة الداخلية ووزارة الدفاع.
وعاد وكيل النيابة ليستكمل بقية التحقيق مع المتهم الذى ظل يبكى بحرقة
_ وكيل النيابة: إهدى كدا، وقوللى كدا كان المخاوى بيقولكوا ايه كمان ؟
_ المتهم: انا قلت لحضرتك يا فندم إنى غلبان وابن ناس غلابة وانا خلاص مابقتش خايف من الاخوان والتنظيمات بتاعهم، انا بس خايف على مصر، خايف عليها من التفجيرات اللى هيعملوها
_ وكيل النيابة: انت تعرف اى معلومات عن التفجيرات اللى هيعملوها
_ المتهم ( يبكى بحرقه وبصوت عالى ): أقر وأعترف يا حضرة المستشار بأن تنظيمات الإخوان والمخاوى وأتباعه هم اللى بيفجروا اللى البلد وهما اللى هايفجروها، يا فندددددم إحنا اللى نفذنا تفجيرات فى القاهرة والجيزة، أحنا إللى نفذنا تفجير ميدان المحكمة فى مصر الجديدة، وميدان الجلاء فى الدقى، وتفجير ميدان لبنان، واحنا اللى تفجيرات كذا مرة قدام جامعة القاهرة ومدينة ٦ اكتوبر وكمائن فى شبرا
المتهم ( يبكى ودموعه تسيل بلا توقف ): إلحق يا حضرة المستشار،، التنظيمات والخلايا العنقودية بتاع الاخوان هيفجروا مصر خلال الأيام اللى جاية،، بلغوا كل المصريين بأن الاخوان هيفجروا مصر كلها، بلغوا النائب العام والشرطة والجيش، خلوا الجيش يا فندم ينزل يحمى البلد، لازم الدبابات تنزل تحمى البلد من التفجيرات اللى هتحصل وبيخططوا لها.
_ وكيل النيابة: انت تعرف التفجيرات اللى جاية هتكون فين ؟
_ المتهم ( باكيا وواضعًا يده على رأسه ويقول ): ايوا اعرف طبعا
،،، ونكمل بكرة انشاء الله،، ومستنى تعليقاتكوا !!
تابعوا آخر أهل مصر على Google News
