طالبت رابطة "ألتراس أهلاوي" مسؤولي الكرة المصرية بنقل لقاءات فريق الأهلي في دور المجموعات ببطولة دوري أبطال أفريقيا باستاد القاهرة.
وأصدرت الرابطة بيانًا رسميًا على صفحتها بموقع "فيسبوك" للتواصل الاجتماعي، قالت خلاله: "مباراة مصر ورواندا للشباب اتلعبت على ستاد القاهرة بعد ما كان مقفول لشهور ممكن تعدي السنة كمان.. طول الوقت اللي كان مقفول فيه كان بيتقال انه مش جاهز لاستقبال المباريات والحمدلله معنى كدة انه بقى جاهز" وفقا للبيان.
وتابع البيان: "مباراة الأهلي وأسيك هتكون في نهاية الشهر ده وهتكون في رمضان.. جمهور الأهلي ممكن يسافر ورا فريقه آخر الدنيا تحت أي ظروف".
وأوضح البيان: "لكن مفيش أى سبب إن جمهور الأهلي اللي غالبيته هيكون من القاهرة ومحافظات تانية إنه يسافر في الصيام لبرج العرب ويفطر عند الاستاد والمباراة هتنتهي الساعة 12 بالليل ويكون سحوره في الطريق"، مشيرين عبر البيان، أنه لا يوجد مبرر يمنع اقامة المباراة فى استاد القاهرة.
وطالبوا، بحسب البيان، باحترام المشج، قائلين: " الحديث على تخطيط وتنظيم وعودة الجماهير للمدرجات لازم يكون في تفكير صح واحترام للمشجع ومعاملته معاملة آدمية".
واختتم بيان الأولتراس أهلاوى: " الأهلي ملعبه ستاد القاهرة مش برج العرب.. والأهلي بيلعب بإسم مصر زي المنتخب..ونتمنى إن الأهلي يتعامل نفس المعاملة".
تابعوا آخر أهل مصر على Google News
