حصلت «أهل مصر» علي فيديو يكشف من خلاله محافظ السويس خبرته في كيفية التخلص من الفئران والبراغيث، مؤكدا أنه قام بدراسة الفئران وتحركها ودراسة النظام الذي يتبعة البرغوث.
وقال اللواء أحمد الهياتمي، أننا لو اردنا التخلص من الفئران نعمل بودرة معينة علشان نموت البرغوث ويبقى عندنا فار نضيف، مؤكدا أن البرغوث «بيسيب الفار ويسرح على الناس وﻻزم يموت الأول».
وأضاف المحافظ: «اخدت مهمة علشان اموت الفيران فى مكان ما وكان هذا هام جدا لأتعلم كيفية القضاء عليهم، ودرست الفار بيتحرك ازاى بيعمل ايه وذكائه ايه والبرغوت نظامه ايه»
وأوضح الهياتمي، أنه للتخلص من الفأر نعمل البودرة الاول وسم بطئ المفعول «علشان لو مات فار التانى ميموتش ويحصل سيولة فى الدم وبعدين سم طويل المفعول والمتبقى يخلص».
وتابع محافظ السويس: «شوف ده فار مش اى كلام وكل حاجة ليها علم والعلم اننا ندخل الاسلوب العلمى فى حل المشكلة، وشوف انا بتكلم عن الفيران بطريقة علمية اومال لو عن حاجة.. صح ولا ايه».
وأكد مصدر مسئول بمحافظة السويس، أن هذا الفيديو تم تصويره داخل دار مسنين السويس عندما قام المحافظ بزيارته منذ فترة.
تابعوا آخر أهل مصر على Google News
