نشرت صفحة «افرجوا عن الضحك» على موقع التواصل الاجتماعي «فيس بوك» رسالة لمحمد عادل أحد أعضاء فريق «أطفال شوارع» من داخل زنزانته.
وقال محمد في رسالته: «محدش يستهون بأي كلمة حتى ولو صغيرة لواحد مسجون، «شد حيلك» أو «ما تخافش»، أنا اعرف هنا ناس اللي مانعها تتجن أو تموّت نفسها كلمة صغيرة من دول».
وتابع: «أنا ببص على النتيجة ست سبع مرات ألاقيها نفس اليوم، زهقت، اليوم هنا في السجن طويل لدرجة إني بانام وباقوم ست سبع مرات في نفس اليوم».
وأردف: «"في السجن هنا رجالة بشنبات بتتكور تحت ملاياتها بالليل ويعيطوا، السجن بيكسر الناس، أنا كل ما أتكور تحت ملاية أمي علشان اتكسر وأعيط اشم ريحة معفنة اروح قايم».
و أضاف عادل: «أي هواية في السجن مملة، القراية مملة، الكتابة مملة، الغنا ممل، الناس برا عايشة في نعمة مش مقدراها، أكبر نعمة في الكون إنك تقوم وتفتح باب الأوضة وتنزل الشارع».
و أضاف: «عدى علينا أكتر من خمسة جايين يقابلوا السيسي واتقبض عليهم عند قصر الاتحادية وجم بيّتوا هنا، واحد منهم مصمم إنو المهدي المنتظر، طمني عليكوا برا، انتوا اتجننتوا؟».
وتابع: «معانا دكتور اقتصاد ولواء جيش ومهندس ومترجم في الداخلية وسكرتير نيابة ودكتور وممرض ورجل أعمال وشيخ أزهر، أنا نفسي أفهم مين لسه برا؟».
واختتم رسالته: «في ناس ما كنتش اتوقع أبدًا يجوا جم، وناس كنت مستنيهم يباتوا ليل نهار قدام القسم شوفت وشهم مرة صدفة كده وخلاص، الصحاب بيتغربلوا يا كبير».
الجدير بالذكر أن الأجهزة الأمنية القت القبض على فريق «أطفال شوارع»، في شهر مايو الماضي، لاتهامهم بتسجيل مقطع فيديو مسيء ومحرِّض ضد الدولة
تابعوا آخر أهل مصر على Google News
