بالفيديو والصور.. أمن مترو شبرا الخيمة يقتحم محلات المؤسسة

اقتحم عساكر أمن المترو بشبرا الخيمة صباح اليوم الثلاثاء المحلات بميدان المؤسسة، بعد معاكسة أفراد الأمن لسيدة زوجة أحد من أصحاب المحلات وتدخل عدد من المتواجدين بالميدان لرفضهم ما يفعله العساكر بالسيدة، إلا أن أفراد الأمن ورفضوا التدخل وقاموا بضرب أحد الاشخاص ثم دخلوا إلى معسكر الأمن بالميدان بعد تهدئة الوضع ثم خرجوا مره أخرى بين الساعة الثالثة والنصف والرابعة صباحًا وقاموا بتحطيم عدد من محلات وفرش الباعة الجائلين وتكسير أوجه المحلات وسرقة عدد كبير من الموبايلات والملابس.

وقالت السيدة صاحبة الواقعة: "خرجت لأشتري ملابس لأولادى وفوجئت بخمسة عساكر عاكسونى وتحرشوا بي، واستغثت بالناس وبعد تهدئة الوضع روحت البيت وجالى تليفون الفجر أن المحل بتاعك اتكسر، جيت لقيت الموبايلات متكسرة وسرقت موبايلات ثمنها 120 ألف جنيه وفلوس من الدرج، كل ده ليه؟ علشان قلت عيب ومينفعش! هما يرضوا أن حريمهم يتحرشوا بيهم فى الشارع؟ والعساكر مش محترمين والناس عملت إيه علشان يتعمل فيهم كدا؟ ويخرجوا بسنج وشوم ويكسرو أقفال المحلات لما العساكر والحكومة تعمل كدا سابوا أيه للبلطجية والهاجمين والحرمية؟".. وأنهت كلامها بحسبي الله ونعم الوكيل.

وقال محمد أحد أصحاب المحلات: "المحل ده بيأكلنا عيش وكسروا أخويا مرمى فى المستشفى، لا يرضيني الرئيس ولا يرضيني حكومة ولا يرضيني أى حد وحسبي الله ونعم الوكيل".

وقال آخر: "هو الشعب اللى فى خدمه الحكومة ولا الحكومة اللى فى خدمه الشعب طلعوا علينا، وإحنا بنتسحر وكسروا كل حاجه، ده يرضى مين وكل اللى عملوا ده بعلم من الحكومة".