داعب الدكتور محمد عثمان الخشت، رئيس جامعة القاهرة طلاب الجامعة عبر منشور له على صفحته الرسمية على موقع التواصل الاجتماعي، "فيس بوك"، قائلًا :" بصراحة انتم بتهرجوا ، يعني (يا شباب تجارة عربي) قصدكم يعني اننا بنميز بين انجليش وعربي، وليه بتعتبروا انهم احسن منكم، لأ بقى .. مفيش حد أحسن من حد، وأنا شخصيا بقى اعتز بولادي وبناتي كلهم: عربي، انجليزي ، هيروغليفي بجد .. بس اعمل ايه القافية بتحكم".
ووجه "الخشت" رسالة إلى طلاب جامعة القاهرة، قائلًا:" أنا أتدخل من قبل بداية الامتحانات وشكلت لجان طواري ولجان ممتحنين، حتى تراجع تصحيح المواد التي بها شكاوى وتتأكد من مراعاتها لمستويات الطلبة والمنهج الذي تم تدريسه بالفعل، ولها الحق في إعادة توزيع الدرجات طبقا لمقاييس علمية، ورفع الدرجات بمعدلات اكاديمية وفقا (للمنحنى الاعتدالي). وطبعا مفيش حد يسألني يعني ايه (المنحنى الاعتدالي)؟ هو حاجة كويسة فعلا واحنا هنعمل بعد الامتحانات مسابقة للي يعرف المنحنى الاعتدالي ".
وتابع:" أيضا نبهت بعدم اعلان أية نتيجة منخفضة قبل العرض على رئيس الجامعة. والعام الماضي حصلت نفس القصة مع سنة ٣ تجارة، وتكررت تاني مع سنة رابعة السنة دي (نفس الدفعة .. يا محاسن الصدف).
وأضاف "الخشت"، :" نكمل مذاكرة، ونبطل فيس، الله يقطع الفيس وسنينه ويقطع النت على النتيت (وبلاش اللي "بينتتوا" عليه)، شباب نذاكر ، ولا نضيع الوقت ، عشان الامتحانات القادمة، انظر أمامك ، ولا تنظر خلفك، نصيحتي لك في الامتحانات وفي كل شيء . واترك ما فات لله ولن يخذلك طالما تبذل كل جهدك. انا متاكد، وجربت، ركزوا في الامتحانات القادمة، وأما المنتهية فسيبوها لي فعلا كل واحد سوف يأخذ حقه، ولن نضيع جهد احد".
وقال:" أنا عارف واتابع كل حاجة على الأرض وقبل ما تكتبوا على الفيس ، ومفيش ورائي غيركم، ذاكروا بقى وركزوا ولو شفتكوا تاني على الفيس معنى كدة أنكم لا تذاكروا، ومفيش لجان ممتحنين ، ومفيش اعادة توزيع درجات ، مفهوم ".
تابعوا آخر أهل مصر على Google News
