للنجم محمود عبد العزيز حكايات مع السندريلا سعاد حسني، وكان قد عمل معها في فيلمين، المتوحشة والجوع، وفي شهادته لبلال فضل يكشف الساحر الكثير عن السندريلا
ويقول في البداية «سعاد حسني فنانة نادرة جداً، فنانة شاملة ومعجونة تمثيل، وفي رأيي ما حصلش إن جِه وجه مصري يعبر عن الجمال المصري وعن المرأة المصرية بكل شقاوتها وحزنها وأنوثتها ومشاكلها زيها، وأنا شخصيا باحترم جداً لقب سندريلا السينما المصرية، وأقدر اللي أطلقه، لإنه أصدق لفظ اتقال عليها، وباقوله بجد مش مجرد كلام»
ويضيف «مع إني اشتغلت مع سعاد وهي في قمة نجوميتها وكنت أنا في بداياتي، لكن عمري ما حسيت برهبة وأنا باتعامل معاها، من أول لحظة شفتها فيها، إنسانة بسيطة جداً وشعبية جداً، بنت بلد جداً، تكسب الأرض على طول مع كل اللي حواليها، وكان عندي سعادة غامرة في كل لحظة اشتغلت معاها فيها، سعادة مش من السهولة إنها تحصل أو تتحقق، بالمناسبة هي أول واحدة خلتني أرجّع شعري لورا، كنت دايماً أفرق شعري على جنب، وفاهم إني كده في أحسن حال لغاية، كان عندها إحساس فطري بالجمال، إحساس عفوي وخير ومحبة لكل اللي بيشتغل معاها كبير أو صغير، وحرام إن السينما والوسط الفني يتحرم من الطاقة الجميلة دي، ولازم ده يتغير فوراً»
تابعوا آخر أهل مصر على Google News
