انتشر "التوك توك" في مصر كالنار في الهشيم بالرغم من أنه قوبل بالرفض من المجتمع المصري في بداية ظهوره، وكانت سبباً في الزحمة والفوضى والضوضاء في الشارع المصري، وبعد مرور 10 سنوات من ظهور التوك توك في شوارع مصر قررت الحكومة أن تعترف بيه وبعد أن سمحت للسائقين باستخراج تراخيص لهذه المركبة، أصدر "عبد العظيم حسين"، رئيس مصلحة الضرائب، القرار رقم 1 لسنة 2019 بشأن أسس المحاسبة الضريبية لنشاط مركبات "التوك توك"، وذلك بعد دراسة شاملة لهذا النشاط، وهو ما يعني فرض ضريبة سنوية على "التوك توك".
ورصدت "أهل مصر" رد فعل سائقي "التوك توك" بشأن فرض الضرائب عليهم، ويقول "عبد الصبور" أحد السائقين، "أنا جبت التوك توك من 10 شهور ولو في حاجة أحسن من التوك توك مكنتش همانع بس أهو احنا بناكل عيش عليه مش أكتر وأنا شايف أن المدينة والبلد مش مستقرين على حاجة شوية هنمنع التوك توك وشويه هنفرض عليه ضريبة وإحنا عاوزين ناكل عيش ولو الضرائب صالحه لينا يعملوها ولو مش صالحة بلاش وياريت تكون ضريبة سنوية ومبلغ ضئيل وكويس على قدر التوك توك علشان ده فاتح بيوت وبيساعد الناس والشباب كلها زي ما انت شايف حالتهم ضنك".
وأضاف فرج، سائق توك توك أيضا "التوك توك الملجأ الوحيد للشباب العاطلين من البطالة ولو الدولة بتساعد الشباب بجد تخلي التوك توك زي التاكسي ويكون لينا حقوق وعلينا واجبات وياريت بلاش نظرة الناس لينا إننا شباب صايع وفاشل، وأغلبنا حاصل على شهادات وكليات بس ملناش فرصة عمل غير التوك توك زينا زي شباب كتير في البلد".
تابعوا آخر أهل مصر على Google News
