علقت الدكتورة منى مينا، عضو مجلس نقابة الأطباء، على الزيادات الأخيرة للمرتبات وأسئلة الأطباء المتكررة حول الأمر، وقالت "مينا"، عبر منشور لها على صفحتها الشخصية على موقع التواصل الاجتماعي "فيس بوك": "بمناسبة الزيادات الاخيرة للمرتبات في أطباء بتسأل .. فين الكادر ؟؟؟ وفين بدل العدوى ؟؟؟ وليه ساكتين على تجميد الحوافز عند اساسي 2015 ؟؟؟والنقابة خايفه تتكلم و لا أيه ؟؟؟؟؟".
وتابعت: "الحقيقة صدمت أن زملائنا مش عارفين اللي بيتعمل في الموضوعات دي .. رغم اننا بنقول و نشرح و " نهاتي" دايما .. عموما خليني اوضح تاني.. الكادر اقر من سنين بعد مناقشات واسعة ومفتوحة مع الاطباء وقدم للجنة الصحة في مجلس النواب من بدء تشكيل المجلس .. وطبعا مركون في الدرج .. وكذلك "حديثا من سنتين" مقترح منفصل برفع بدل العدوى".
وأضافت: "مشكلة تجميد الحوافز رفعنا قضية بخصوصها بعدما فشلت المناقشات و المذكرات في حلها ..والقضية منظوره في المحاكم ..وطبعا دي مشكلة تخص حوافز كل القطاعات مش الاطباء فقط .. ولا المهن الطبية فقط .. أما قضية بدل العدوى فالنقابة حاربت فيها كما لم يحارب احد ..و لكن للاسف لما كنا بنطلب من زملائنا يحضروا معانا الجلسات عشان يكون في زخم وضغط اعلامي ..مكانش حد بيجي ..كنا بنكون بالاغلب من 5 إلى 10 من اعضاء المجلس .. وطبعا بعد ما عرفنا المجتمع كله والاطباء كمان ان في حق مهدر اسمه بدل عدوى ..بعد ما بروزنا هذا الحق اللي زملائنا محدش منهم كان بيتكلم عنه و لا ملتفت له اساسا ..وحاليا بيهاجمونا انهم لو يصرفوا مستحقاتهم منه ., بعد ما قدمنا كل ما يثبت ده علميا وفي العالم كله ..وبعد ما كسبنا الحكم في اول درجة ..الحكومة طعنت امام الادارية العليا و المحكمة قبلت الطعن تحت دعوى عدم اختصاص القضاء ... برضه خليني افكركم لما كنا عاملين حملة اعلامية وطالبنا زملائنا يساعدونا بتنشيط هاش تاج حول الموضوع ... الاغلبية قررت تقلب الموضوع تهريج وهجوم على النقابة عشان بتطالب بمشاركة بسيطة من الزملاء وكل واحد في بيته .. خد بالك دول نفس الزملاء اللي بيقولوا محدش فاضي يجي معاكم محاكم !!!!".
وقالت: "الخلاصة احنا بنعمل كل ما نستطيعه ..ولكن النقابة بدون إلتفاف الاطباء ومشاركتهم لن تستطيع تحقيق شئ .. قوة النقابة هي تضامن أعضائها و ليس أي شئ أخر .. أي حجج لعدم المشاركة = المزيد من التدهور .. خد بالك كمان ان كلام الزملاء انهم مش ها يشاركوا إلا باضراب ده تهريج ..لاننا في الجمعية العمومية بتاعة دعم د.محمد حسن و قبله دعم د.محمود ناصر نزلنا استمارات التصويت المعدة للجمعية وفيها اختيار الاضراب والاستقالات الجماعية .. ومكملناش نص النصاب .. عشان الزملاء اللي كانوا بيتكلموا عن الاضراب كانوا بيقولوا كلام بس ..وهم عارفين أن تنفيذه حاليا صعب جدا وخطر عليهم .. انا ممكن اعذرهم في الظروف الصعبة جدا اللي احنا فيها .. بس لازم نبقى صريحين مع نفسنا .. وندور على فاعليات ابسط نتضامن بها مع مطالبنا .. نحضر مع قضيانا ..نتشارك في حملات فاكسات و حملات اعلامية بكل الطرق .. باختصار للاسف النقابة بتحارب لوحدها ..بنجدف بادينا عشان محدش من زملائنا بيساعدنا بالمجاديف .. هل ها نفضل كده و لا الزملاء ها يختاروا يشاركوا ؟؟؟".
وذكرت: "خليني اقول كمان لو ما دافعتوش عن مصالحكم في تدهور اكتر واخطر يلوح في الافق ..كليات خاصة بدون مستشفيات ولا مستوى علمي = عدد كبير من الخريجين مع مستوى منحدر = إلغاء للتكليف مع انحدار اجر الطبيب في القطاع الخاص و في العمل بالخارج ..باختصار أن الاطباء تصحصح عشان تدافع عن نفسهاو مهنتها ده موضوع مهم جدا حاليا ... إن لم يكن لتحسين الاوضاع يبقى لوقف التدهور".
تابعوا آخر أهل مصر على Google News
