المخرج خالد الحلفاوي لـ ابن محمود الجندي: "مش هاجي أعزى عشان لازم أصور عمل تافه"

كتب : دينا دهب

فضفض المخرج خالد الحلفاوي نجل الفنان نبيل الحلفاوي مع جمهوره ومتابعيه عبر حسابه بموقع "فيسبوك"، بعد عدم استطاعته أخذ إذن من عمل يصوره للمشاركة في موسم شهر رمضان المقبل، لكي يحضر عزاء الفنان محمود الجندي المقام مساء اليوم الجمعة في الشيخ زايد، وكتب: " شغلانة صعبة اوي اللي مبتقفش على حاجة أو على حد، هتكمل اليوم وهتشتغل عشان اليوم متكلف قد كدة أو عشان لو وقفت شغل النهاردة مش هتلحق الميعاد الفلانى".

وتابع الحلفاوي: "حد مات من العاملين بالمسلسل؟ ينفع نفركش النهاردة احتراما للوفاة؟ بنحاول بس لأ مطلعش ينفع لأن الممثل الفلانى مش فاضي غير اليوم ده وبعد كدة مساف، أو مكان التصوير مش متاح غير النهاردة، ولو أخلينا بده أو ده مش هنلحق نسلم فى الميعاد".

وأضاف: "نقف دقيقة حداد وخلاص وبعدين نشتغل ونعمل كوميدي وندور على افيهات بينما الزميل أهله بيدفنوه، أعز الزملاء بالنسبة لى أبوه مات والعزا بالليل، مينفعش تروح تعزي عشان عندك تصوير الجمعة بالليل، ومينفعش توقف تصوير عشان مش هتلحق رمضان، كلمه عزيه فى التليفون، هو أكيد فاهم انك بتصور، عيالك مش بيشوفوك؟ مش مشكلة عارفين انك بتصور، عيان ومش قادر؟ مش مشكلة بس انت هتصور، وافتك المنية وربنا خدك برضه العمل هيكمل و هيتصور، هذا البوست ليس للشكوى فضفضة بس".

واختتم خالد الحلفاوي وقال: "الله يرحم عّم ياسين مساعد الملابس و عّم محمود الجندى الممثل، وربنا يصبرك يا أحمد يا جندي يا أغلى الناس على فراق أبوك وآسف انى مش هاجى أعزى عشان لازم أصور عمل تافه يؤدى بمنتهى الحماس".

يشار إلى أن خالد الحلفاوي يصور حاليًا مسلسل "من أول نظرة"، المشارك في قائمة مسلسلات رمضان 2019، وهو من بطولة دنيا سمير غانم وبيومي فؤاد، ومحمد سلام.

وعلق الفنان أحمد السعدني على كلام خالد الحلفاوي وكتب: " من الكبير للصغير ملناش تمن في مهنتنا للاسف طول مانت جامد فوق راس الكل أول متمرض أو تموت أو حتي نجوميتك تقل مع السلامه مش مهم اللي بعدوا الله يرحمك يا عم محمود".