برسالة مؤثرة.. نجل إبراهيم يسري يحيي ذكرى ميلاده

كتب : منى رجب

أحيا الفنان الشاب محمد إبراهيم يسري، نجل الفنان الراحل إبراهيم يسري ذكرى عيد ميلاده الذي يصادف اليوم الموافق السبت 20 إبريل، ونشر صورة له وهو طفل برفقة الراحل إبراهيم يسري، عبر حسابه الشخصي بموقع التواصل الإجتماعي فيسبوك.

وكتب نجل إبراهيم يسري: "من اربع سنين وتقريبا في نفس الساعة شفتك بتاخد اخر نفس ليك.. وبالرغم من انك كنت في غيبوبة حركت بقك و قلتلي حاجة.. لغاية النهاردة أنا مش متأكد بشكل قاطع أنت قلت ايه ولا عارف إذا كان فعلا قصدك تقول حاجة و لا مجرد حركت بقك و أنا تخيلت انك بتقولي حاجة... لكن أنا فاكر كويس اوي أنا كنت بقولك ايه... فاكر أني كنت بقولك يلا قوم عشان نحتفل بعيد ميلادك بالرغم من انك معظم سنين عمري كنت بتبقي ناسي انه عيد ميلادك أصلا.. كنت بقولك يلا عشان أجيبلك هدية بالرغم من أني عمري ما عرفت اجيبلك ايه من كتر ما أنت كنت بسيط جدا في كل حاجة ومبتحبش هدايا العيد ميلاد وبتعد تضحك لما نجيبلك تورتة ونغنيلك مع انك كنت غاوي تعمل حفلة وتفضحنا لما كان بيبقي عيد ميلاد حد فينا".

وتابع قائلاً: "لما الدكاترة قالولي انك خلاص مسافة وقت وتبقي عند ربنا فاكر كويس اوي أنا وعدتك ب ايه... و كل كلامي معاك ده خلاني متأكد ان اخر كلمة قلتهالي وأنا ماسك أيدك وأنت بتحرك صوابعك كانت بحبك... وحشتني اوي يا هيما.. أنا عجزت اوي وتعبت اوي من غيرك يا حبيبي.. عزايا الوحيد هو أني متأكد انك في مكان احسن بكتير ونعمة ربنا اللي انعم بيها علينا في حب الناس ليك وحبهم ليا بس عشانك... ربنا يرحمك يا أغلي الناس.. وحشتني كلمة بقت ماسخة اوي لا يمكن توصف أنا آد ايه حياتي ناقصة من غير ضحكتك وحضنك... بتوحشني كل يوم زيادة عن اللي قبله يا هيما... ربنا يرحمك و يسعدك, كل سنة و أنت طيب يا حبيبي".