قدم الاخصائي النفسي إسلام خميس، عدد من النصائح المهمة لطلاب الثانوية العامة لزيادة التركيز ومنع شتات الذهن، والتي يجب مراعاتها أثناء المذاكرة والامتحان حتى لا يفقد الطالب تركيزه وقدرته على تحقيق حلمه والوصول لهدفه من خلال التوتر والقلق الشديد الذي يصيب الجميع طوال فترة الامتحانات.
7 نصائح نفسية تهمك أثناء فترة الامتحانات:-
1- ليلة الامتحان
"هي للمراجعة يعني أنت ذاكرت بقالك 8 شهور أو أكتر بتذاكر، الليلة مجرد لمراجعة بس يعني بلاش تضغط علي نفسك وتطبق.. أنت اصلا مذاكر !!
2-وانت بتراجع هتحس أنك ناسي أو خايف تنسي في الامتحان حابب أقولك أن دا في الغالب نتيجة للتوتر النفسي مش أكتر فأطمن أنت مذاكر وهتفتكر بس كمل مراجعة بهدوء.
3- يا صديقي أوعي تطبق ومتنامش إلا لو متعود على التطبيق دا وعقلك أتاقلم عليه.. غير كدا بلاش علشان أنت بتغامر بمستقبلك.
الابحاث اثبتت ان عدم نومك ساعات كافية دا بيأثر علي تركيزك وقدرتك على التذكر.
اقرأ أيضًا.. لطلاب الثانوية العامة 2019.. نصائح لمنع المخاطر الصحية أثناء الامتحانات
4- دخلت اللجنة ردد "ربي أشرح لي صدري ويسر لي أمري" وخذ نفس عميق من الأنف وخرج الزفير ببطء وكرره مرتين او تلاتة "دا تمرين مهم للاسترخاء".
5- وانت في اللجنة تجاهل أي تشتت من أي شخص او حدث وخلي تركيزك كله في ورقتك.
ركز على نفسك وعلى مستقبلك متفكرش في اي حاجة تانية!!
6- خرجت من اللجنة كدا تفكيرك بالمادة دي انتهى وفكر في اللي بعدها.
متراجعش!! متلومش نفسك أو تزعل على أخطائك أو تحسب هتنقص كام درجة، فكر إزاي هتجيب أعلى درجة في المادة الجاية!!
7- متسمعش أي كلام سلبي أو محبط سواء من أصدقائك السلبين أو حتى أقرب الناس ليك.
تابعوا آخر أهل مصر على Google News
