أمير طعيمة معلقًا على أزمة عمرو وردة: "إحترم إنك بتمثل بلد كبيرة"

كتب : منى رجب

علق الشاعر الغنائي الكبير أمير طعيمة على أزمة عمرو وردة لاعب منتخب مصر، في واقعة التحرش التي قام بها اللاعب مع عارضة الأزياء مريهان كيللير، بالإضافة إلى الاتهام الجديد من ملكة جمال مصر السابقة مريم جورج ضده.

وكتب أمير طعيمة، عبر حسابه الشخصي بموقع التواصل الإجتماعي فيسبوك: "عمرو وردة مش قريبي و لا صاحبي ولا بشوف اصلا انه من الأركان الاساسية للمنتخب زي صلاح و تريزيجيه و عبد الله و طارق حامد و حجازي و غيرهم، بس برضه انا كنت و ما زلت ضد وصف فعله بالتحرش و استخدام العنوان ده في كل الأخبار، ما فعله مش تحرش لفظي حتى و ممكن ترجعوا لأي حد قانوني".

وتابع: "أما البنت فأنا برضه كنت و ما زلت ضدها لأن سوء النية واضح و خاصة انها عملت سكرين شوت للاعبين آخرين كل اللي عملوه، انهم بصوا علي صورة في الاستوري هي حاطاها ستوري عشان الناس تشوفها و كل ما بيشوفها عدد أكبر المفروض انها بتتبسط و مش فاهم ده جرح مشاعرها المرهفة في إيه، و ده بيوضح ان ده إحداث والهدف استغلال اسماء مشاهير لجذب الانتباه وتحقيق شهرة زائفة حتي لو علي حساب منتخب بلدها".

واختتم "طعيمة": "بالمناسبة انا لو في الجهاز الإداري للمنتخب هستبعد وردة بس مش عشان التحرش الوهمي، هستيعده عشان لاعب دولي في معسكر المنتخب في بطولة كبيرة هتفرح ١٠٠ مليون لازم يبقي في قمة تركيزه مش قاعد علي الانستجرام يتفرج علي صور بنات، نخلينا ورا منتخبنا و بلاش ننساق ورا موضوع تافه و نسيبه للجهاز الإداري و نخلينا في صفوف المشجعين، أما وردة فإحترم انك بتمثل بلد كبيرة و ابقي اعمل التفاهات دي لما ترجع ناديك في اليونان".