عقب خروج مصر من أمم إفريقيا.. أمير طعيمة: "اتحاد الكرة لازم يبقى أعضائه شبعانين"

طالب الشاعر الغنائي أمير طعيمة، بإعادة بناء فريق جديد للمنتخب المصري لكرة القدم، وذلك بعد خروجه من بطولة كأس الأمم الإفريقية، من دور الـ 16، على حساب فريق جنوب إفريقيا.

اقرأ أيضا.. نبيل الحلفاوي معلقا على خروج منتخب مصر من أمم إفريقيا: "خسرنا عشان النجاسة"

وكتب "طعيمة"، عبر حسابه الشخصي بموقع التواصل الإجتماعي فيسبوك: "إعادة بناء فريق جديد لازم تكون من خلال مدير فني مصري عارف مزايا و عيوب اللاعب المصري زي حسام حسن أو حسن شحاته او أي مدير فني آخر طالما مش عارفين نجيب مدربين عالميين بجد، اتحاد الكورة لازم يبقي فيه اكتر من لاعب كرة شبعان و بعيدين عن أية شبهات مادية زي أحمد حسن و حازم امام و احمد حسام ميدو و حسام غالي و محمد فضل و غيرهم".

وأضاف أمير طعيمة قائلاً: "اللاعبين اللي ينضموا لازم يكونوا الأفضل بعيدا عن أسطوانة ان ناديه بيشارك أفريقيا لأن دورك كاتحاد توفر له مباريات دولية على أعلى مستوى تديه الخبرة، مش معنى ان لاعب محترف انه ينضم على حساب المحلي، فيه محترفين بيلعبوا في أندية صغيرة و محترفين ما بيشاركوش في أنديتهم الكبيرة و فيه غيرهم أحق، لازم تنزل بالسن شوية و لو هتتحجج بضرورة وجود خبرات عندك لاعبين صغار السن وعندهم خبرة دوليه، تريزيجيه لاعب مباريات دولية اكتر من عبد الله و وليد سليمان و مروان محسن و غيرهم، ابني بقي من جديد و المحترفين اللي المفروض يبقوا موجودين المرحلة القادمة هم صلاح و حجازي و تريزيجيه و رمضان صبحي علي اعتبار انه علي ذمة فريق اجنبي حتي الان و بس".

وتابع: "المنظومة كلها لازم تتغير، المسابقات المحلية لازم تبقي بجدول معروف حتى لو هتجيب خبرات اجنبية تأسس لك، اتحاد الكورة لازم يبقي قراراته محسوبة و لازم يبقى اقوى من الأندية ومن اللاعبين، الأندية اللي معاها فلوس لازم تفكر بشكل أكثر وطنية، كفاية تلم لاعبين وانت مش محتاجهم وتنسيهم الكورة واشتري لاعبين في المراكز اللي انت محتاجها فقط، و ادي كل سنة فرصة لناشئ او ٢ مش دايما اللاعب الجاهز اللي مش منتمي ليك هيبقي احسن من ابن النادي خاصة لو كان ابن النادي مميز، الدولة لازم تدعم أندية الأقاليم عشان ما ترميش لعيبتها مع اول واحد يدفع و يروحوا يقعدوا علي ذمة أندية كبيرة في الوقت اللي كانوا متألقين في أنديتهم".

وأختتم حديثه: "الجمهور لازم يرجع و لازم دخوله يبقي من خلال إجراءات و ارقام كراسي تضمن للدولة الوصول للمتجاوزين و للمخربين و اللي بيلعبوها سياسة و شعارات مدفوعة الأجر، نعاقب المخطئ فقط بدل ما نفضل علي الحال ده لما لانهاية بسبب تجاوز بعض الجماهير، فيه جماهير كتير عايز تتفرج علي كورة و تستمتع فقط، المنظومة كلها لازم تتهد و تتبنى من اول وجديد لو مش عايزين تحرقوا دمنا عاشر".