أصبحت القصة الشخصية التي نشرها الفنان أحمد السعدني له عن طليقته التي رحلت منذ يومين، حديث مواقع التواصل الإجتماعي حيث اعتبروا أن هذه القصة عبرة للكثيرون كي لا يعرفوا قيمة من معهم قبل فوات الآوان، وحرص عدد من نجوم الفن بكتابة تعليقات للفنان أحمد السعدني بعد المنشور الذي وضعه فجر اليوم على حسابه بموقع "فيسبوك"، فوجدنا صلاح عبد الله كتب له: " وبقدر ماأبكيتني وأحزنتني أسعدتني ياسعدني بما كتبته للعامة هنا وبكل الصدق والشجاعة فكان ياولدي كلامك هذا الذى أراه بحق درساً لكل الشباب بل لكل الرجال بل للكل بلا إستثناء وأولهم العبدلله".
وكتب عباس أبو الحسن: " صراحتك وشفافيتك وبصيرتك في عز أزمتك مذهلة.. ميزان العدل والحيادية والصدق في الروي بتاعك وقدرتك علي تعرية مشاعرك والتسامح مع ادانة نفسك شجاعة فرسان يا أحمد ومش موجودة ..ربما كلامك دة هو الصدقة الجارية علي روحها .. كتير قوي من الجانبين هايستفيدو ا.. المستكنين الصابرين واللي السكينة سارقاهم هايعملو وقفة ويراجعوا حياتهم وأولوياتهم..عمر ما الإحساس بالذنب ولا جلد الذات ها يغير شيئ..ربنا يقدرك في رحلتك اللي جاية مع اولادك حبيبي".
بينما كتبت مي كساب: " ربنا يريح قلبك ما تنسهاش من الدعاء وعوضها في اولادها وعلمهم يفتكروها دايما دايما بالدعاء والصدقه الجارية واعملولها عمره وحج أما تكون قادر ربنا يرحمها ويخليك لأولادك".
وعلقت درة: " الله يرحمها ويجعل مثواها الجنة.. هي اكيد ما تتعوضش بس هي في مكان احسن..وربنا يصبرك يا أحمد على فراقها ويقويك ويصبّر الولاد، ويقدرك على تربيتهم وتكون احن اب لان جواك طيب وجدع ونبيل.. وربنا يخليلك اسرتك وصحابك وانا منهم واللي بيحبوك كلهم هتلاقيهم جنبك وفِي ظهرك".
وقالت نشوى مصطفى: " قلبى وجعنى اوى ربنا يصبرك ويعينك ويقويك — حبيبتك حتفضل عايشة معاك ملامحها حتشوفها فى ولادكم وروحها حتحاوطك انت وهما — ربنا يراضى قلبك الطيب ويسامحك ويعينك على ولادك وتكمل رسالتك فيهم — قلبى عندك يااحمد هون على نفسك".
وكتبت المطربة شذى: " الله يرحمها يا احمد اكيد هيا في مكان احسن و ان شاء الله تكون اب و ام لأولادكوا و اكيد هيا مش زعلانه منك و مسمحاك انت قلبك طيب و احساسك اكيد واصلها هيا مشيت من الدنيا بس هيفضلوا اولادها و دعاءهم ليها رابط ليها مع الدنيا ربنا يقدرك و تخليهم احسن رجاله في العالم و تخليها دايما واصلها احسن اخبار عنهم ربنا يرحمها و يصبركوا يا رب".
طليقة أحمد السعدني
ويعيش الفنان أحمد السعدني لحظات من الحزن والندم بعد رحيل طليقته ووالدة أبنائه أمل سليمان مساء الجمعة الماضية إثر أزمة قلبية حادة، وبعد أن قال أحمد السعدني بالوقوف في جنازتها بمسجد سعاد كفافي أمس السبت وتلقى العزاء بها في نفس اليوم بمسجد الشرطة بالشيخ زايد وسط دموع أبنائه الصغار "عبد الله وياسين"، شارك السعدني جمهوره بكلمات مؤثرة ومبكية توضح مدى تأثره بوفاة طليقته.
وفاة طليقة أحمد السعدني
وكتب أحمد السعدني عبر حسابه بموقع التواصل الإجتماعي "فيسبوك": "عمري في حياتي ما اتكلمت عن حياتي الشخصيه لكن حسيت اني لازم اعمل كده دلوقتي فذكر إن الذكري تنفع (المؤمنين) أو الكافرين أو المستهبلين أو تنفع اي حد حس اني عملت حاجه، ححاول مطولش يوم ٩/٩/٢٠٠٣ حب من أول نظره في الشارع ما بين معهد السينما حيث كانت تدرس ومعهد فنون مسرحية حيث كنت الهو و ادرس برضه ميضرش كنت راكب عربيه و كانت ماشيه علي رجلها كنت حخبطها لكن حصل خير لا محصلش قوي خبطتتي هي في قلبي حب تقطيع شرايين سنة خطوبه سنة كتب كتاب شهر جواز خلفة أول ولد هنا بدأت المشكله اللي بكتب الكلام ده عشانها".
بداية المشاكل بين أحمد السعدني وطليقته الراحلة
وتابع أحمد السعدني وقال: "أنا زي كتير للاسف شباب anti تحمل مسئولية بص لنسب الطلاق وانت تفهم انا بيجيلي ارتيكريه لما احس اني مسؤول وهي برضه حبيبتي زي بنات كتير بتقول طلقني أكتر مبتنطق اسمي كانت النتيجه في أول سنة بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالى يا عم طبق الشروط ادي اول طلقة، قشطه يا باشا عشت حياتك؟ اه ...ارتحت ؟؟ لا ".
الرجوع بعد أول طلاق
واستكمل السعدني: "وحشتني وحشني حنيتها و حبها و هبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكريه بس المرادي صموووووود مش حينفع نتطلق تاني، لا تصدق نفعت الجانب الاناني في شخصيتي غلبني يا عم كبر مخك وعيش حياتك المشكلة اني عمري ما رتحت كنت عايز حضنها وحنيتها وهبلها بس كنت بأجل الرجوع يمكن أكبر أو أعقل أو أقدر اتحمل المسؤليه بجد، حددت لنفسي سن معين ارجعلها فيه قال يعني حبقي نضجت بس ملحقتش ماتت في لحظه كانت بتكلمني قبلها بساعة و مكنتش عيانة كان عندها ضغط زي أغلب الشعب المصري الحمد لله".
وأضاف أحمد السعدني: "ماتت ومشيت وقررت تسبني للابد كنت فاكرها حتستناني ومتاكد من ده مستحيل تحب حد غيري مجاش في بالي انها ممكن تموت دلوقتي صغيرة واكتر واحدة في حياتي شفتها بتحب الحياة وعندها طاقة ايجابيه ، ماتت وسابتلي الولدين والندم ".
واختتم كلامه: "انا متاكد انك في الجنه رحتي للي خلقك يوم عرفه وأميرة وست البنات والستات ونضيفه وكريمة وصنتي ولادي وبيتي، بحبك يا أمل حياتي اللي اتهد وبوعدك المرادي حشيل المسؤوليه للاسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من احن ام ربنا يقدرني واربيهم احسن ما كنتي عايزة بحبك ومش بطلب منك غير انك تسامحيني، ربنا يرحمك ويرحمني ويرحم ولادنا يا حبيبة عمري الوحيده".
تابعوا آخر أهل مصر على Google News
