قال الناشط السياسي وائل غنيم، إنه يعاني حالة من الاكتئاب بسبب الحياة خارج مصر، موضحا أنه لا يزال ينتمي إلى مصر.
وقال غنيم، عبر صفحته الرسمية على فيسبوك: "النهاردة آدم بقه عنده 8 سنين، هو صحيح اتولد في مصر بس مقعدش فيها غير سنتين، لأننا نقلنا لدبي في 2010، وبعديها لأمريكا في 2014. آدم كلامه العربي قليل جدا برغم إنه بيروح دروس عربي بشكل أسبوعي لأن كل تواصله مع اللي حواليه بالانجليزي. أنا مُقصِّر جدا معاه في الموضوع ده".
وأضاف: "فرحت جدا لما لقيت اسراء بتتفرج على مسلسل نيللي وشريهان في رمضان وبقيت أتفرج معاها عليه كل يوم قبل ميعاد نومها. على الأقل في حاجة بتربطها بمصر حتى لو كان مسلسل على يوتيوب. إسراء عندها 13 سنة وبقالها 3 سنين مشافتش جدتها ولا قرايبها. دايما بتسألني هو إحنا هنروح مصر إمتى، بس عمر إجابتي ما كانت مقنعة ليه".
كما تابع: "جواز سفري المصري انتهى من خمس شهور ومن ساعتها مقدمتش على تجديد الجواز برغم إن ده مانعني من السفر لأي حتة بره أمريكا. مش عايز أعيش تجربة إن موظف ما في مكان ما يقرر يعاقبني على انتمائي لبلدي وعدم حصولي على أي جنسية تانية بالرغم إن ده كان متاح لي من 15 سنة، ويقرر يمنع تجديد الجواز. بيدي لا بيد "عمرو".
واستطرد غنيم: "الناس ممكن تكون شايفاني سعيد وعايش حياة هنيئة، وبرغم إني مقدرش أنكر إني أحسن حالا من ناس كتير، وإني عايش في منطقة فيها مجموعة من أجدع المصريين اللي عرفتهم في حياتي، لكن كل فترة والتانية بتجيلي لحظات اكتئاب حادة بسبب اللي وصلناله، نفسي أعمل حاجة تساعد في إصلاح الوضع بس كل اللي عندي أسئلة مش لاقيلها إجابات وشكوك مش يقين.. الاكتئاب اللي عندي سببه مش يأس ولا إحباط بالعكس غالبا سببه إني لسه حاسس إن فيه أمل بس مش عارف ألاقيه.."
تابعوا آخر أهل مصر على Google News
