ربة منزل تروي تفاصيل جديدة بحريق إيتاي البارود: الناس طارت في السماء من شدة الانفجار.. والضحايا منهم اللي بقى عضم واللي اتفحم واللي محدش لاقيه (فيديو)

كتب : أسماء ناصر

روت ربة منزل تفاصيل جديد حول انفجار خط أنابيب شركة طنطا للبترول في مركز إيتاي البارود بالبحيرة، وراح ضحيته 8 أشخاص.

وقالت السيدة: "كنا في المنازل منعرفش حاجه لحد ما في جيران لينا كانت بتنادي بصوت عالي أن فيه بنزين ببلاش، كلنا خرجنا علشان نعرف الحكاية، وبعد كدا بقت الناس تفضي جراكن المياة علشان تحط فيها بنزين، وزادت أعداد الناس بكميات رهيبة من العزبة والعزب المجاورة حتي أصبحت الترعة ممتلئة بالطوابير للحصول على البنزين".

واستكملت: "ظل الحال كما هو عليه وأعداد الناس تزيد، حتى حدثت الكارثة واشتعلت النيران في المكان وفي الأشخاص سواء كانت بعيدة عن المكان أو القريبة منه، وسيارات إطفاء الحريق مقدرتش علي الإطفاء، مشيرة: "ناس كتير دفنت تحت تراب إطفاء الحريق، الجو كان مظلم محدش شايف حاجة، ابحثوا تحت التراب في جثث كتير موجودة".

وتابعت: "الناس كانت ما بين طايرة في السماء من شدة الاشتعال والانفجار، وآخرون تحت تراب الإطفاء، والباقي النار تلاحقهم، والناس مش عارفة تتعرف علي الضحايا والحريق قضي عليهم اللي راح تراب واللي بقى عضم واللي اتفحم واللي محدش لاقيه".

وأضافت: "سيارات الإسعاف مكنتش قادرة تنقل المصابين إلى المستشفى من كثرة الاصابات، وتم الدفع بالعديد من سيارات المطافي ولكن الحريق كان كبير لدرجة عدم السيطرة عليه من قبل رجال الحماية المدنية، حتي أصبح رجال الإسعاف غير قادرين علي انتشال الجثث بسبب تفحمها وفصل التيار الكهربائي".