بعد إنتاج شقيقه له.. تامر حسني: "أخويا كان نفسه يشتغل معايا ودايماً برفض"

نشر النجم تامر حسني، صورة له برفقة شقيقه الكبير حسام حسني، عبر حسابه الشخصي بموقع تبادل الصور والفيديوهات الشهير إنستجرام، وعلق قائلاً: "الصوره دي والفرحه اللي في ضحكة حسام اخويا لازم اكلمكوا عنها".

اقرأ أيضا.. شيرين سيف النصر عن الصورة المنتشرة على السوشيال ميديا: "مش صوري أنا في لندن" (خاص)

وتابع: "دا حسام اخويا الكبير كان نفسه يدخل عالم الإنتاج الفني من 5 سنين وينتجلي وانا الحقيقه كنت دايماً برفض وكان بيزعل مني بس كنت دايماً بشرحله انه لازم يدرس السوق الأول وميعتمدش عليا ويفهم ويذاكر كتير اوي مش عشان ينتج لا عشان يكون منتج شاطر وفعلاً عمل كدا واستوعب كلامي وبدأ يتفرج و يتابع كل اللي بيحصل من اول فيلم اهواك وتصبح على خير لحد ما شارك بجزء بسيط في انتاج فيلم البدله واشرف على انتاج البومي عيش بشوقك وانتوا اكيد شايفين العملين طلعوا ازاي للناس وازاي نجحوا والحمدلله كل عمل فيهم في السنه دي حقق نجاح كبير جداً".

وأضاف: "انا في الصوره دي كنت قاعد بمضي عقد اول فيلم انتاجه و وكان بيقولي (طلعت عيني عشان القعده دي) وانا كنت بقوله إوعى تزعل مني انا كنت بعلمك تكون قد المسؤليه لوحدك ودلوقتي بأمانه انت قدها وانا اللي فخور انك بتنتجلي عشان شايفك بجد شخص بقى شاطر جداً ومجتهد وبتفكر صح شركتك دلوقتي فيها اقوى الأفراد من كل الجوانب وانا فخور بيهم كلهم فعلاً ،الف مبروك يا حبيبي يا اخويا الكبير ياللي ياما علمتني حجات جميله وانا صغير النهارده بردهالك من قلبي و بدعيلك ربنا يكرمك ويكرمنا جميعاً ويكرم كل مجتهد وتكمل مشوارك وتنتج ليا ولغيري".

وعلقت الفنانة راندا البحيري على منشور تامر حسني قائلة: "ضحكة حسام سكر وانتِ سكر وانا بحبكم اوي يا اجمل خلق الله،

انت طيب اوي يا تيمو وجدع وخلوق واللي انت عملته صح، وكده الشركه بقت قويه وبتمني من قلبي كل النجاح لحسام ويارب دايما دايما شايفاكم في احسن حال".