تراتيل موت بطئ.. قصيدة لــ محمد حميدة

بردان قوي

مع ان صهد الشمس بيشق الطريق

بوشان دموع الارصفة

بيبل طرف التوب سواد

الواد بيشبك طرف توب الأوليا

ويقول آمين

عوده النحيف بيحيل ما بينه وبين خطاوي المسرعين

فيضم عضمه في ضل حيط

ويخاف من الريح العفي

ليبعتر الباقي في ضلوعه من حياه..

يا أيها الملح الذي

ما بقاش

بيتمر في البشر

ولا حتى في سنينها العجاف

قلبي اللي كان يطرح غنا

من اي شئ اصبح يخاف

الارض كرهت ملحها

اكمنه زاف

يا كل شارع في الوطن

عديت عليه ولا ضمنيش

انا ماشي عريان البدن

مع ان حلمي متر خيش

يا كل شارع في الوطن

ابن الغلابة ازاي يعيش؟!

الليل بيقتل خطوتي

ببرده اللعين

فيبوش في جلدي التلج وينام ع الضلوع

كل الساعات الموحشه تطرح رحيل

ما بقتش بيحلم بالوطن ولا بالرجوع

الجوع يذل اجدعها روح

والبوح في قلب الشقيانين

ما فيهوش كلام

القي السلام

وان اشرت باصبعك

على اي شبر في دا الوطن

ما بقاش مكان

هيدفي روحي من الوجع

ولا م الأنين

كل السنين اللي انقضت

عمر اغتراب

اكمل كتاب الأرصفة والشقيانين

كل الشوارع موحشه

ما فيهاش مكان للغلبانين

حران قوي

مع ان تلج الأرض بيشق السحاب