"هو دا رد المعروف".. عمرو أديب عن وقف طبيب مستشفى العزل عن العمل

قال الإعلامي عمرو أديب، إن دبي ستبدأ في فتح المحال التجارية ولكن بإجراءات احترازية شديدة.

وتابع "أديب" خلال برنامجه "الحكاية" على فضائية "إم بي سي مصر": "دبي وأبو ظبي هيفتحوا المولات بكرة، بس الأطفال لحد سن معين ووقت معين مش هتدخل، الكبار اللي فوق الـ 60 سنة مش هتدخل، ومش هينفع تدخل المول أو المحل من غير كمامة وقفازات، وعلى فكرة كل الدواء اللي اتكلمنا عليه في علاج كورونا مطلعش بينفع".

وأضاف: "انهاردة بيتكلموا عن طبيب مصري كبير في بريطانيا توفي بسبب كورونا، وطبيب تاني في مصر توفي بسبب كورونا، الناس دي بتتعب أوي يا جماعة، انهاردة اتوقف طبيب مصري في أحد مستشفيات العزل في مصر عن العمل لأنه تم تصويره وهو يرقص مع فريق العمل، إزاي يتوقف وهو بقى عايش حياته في مستشفى العزل الصحي في الصعيد، هي دي الطريقة اللي بنعامل بيها الدكاترة بتوعنا، هو دا رد المعروف.. أنا معرفوش لكن الراجل فرحان إن الناس اتعالجت تقوم توقفه؟.. اغفرله باللي قدمه".

واستطرد الإعلامي: "تعال كده اقنعك تدخل مستشفى من دول، وربنا ما هترضى، إنما الناس دي بتجيلهم ناس عندها فيروس كورونا شديد الخطورة وبيتعامل وبيعالج ويهزر ويرفع روحهم المعنوية وإحنا مش حاسين، والناس بتاعت السوشيال ميديا بتقول إزاي مش لابس كمامة".