أحمد السعدني يفتح النار على صناع مسلسل كله بالحب: أعتذر عن تواجدي في هذا العمل.. والواحد ساكت وبيعدي بلاوي

فتح الفنان أحمد السعدني النار على صناع مسلسله الجديد كله بالحب الذي يشارك في بطولته بموسم مسلسلات رمضان 2021، أمام الفنانة زينة، وأعلن انسحابه منه.

أحمد السعدني في مسلسل كله بالحب

وكتب أحمد السعدني عبر حسابه بموقع التواصل الإجتماعي 'فيسبوك': 'بسم الله الرحمن الرحيم، الحقيقة انا عمري ما عملت مشكله في شغلي و عمري ما اختلفت مع زمايلي انما انا اللي بيحصل معايا في المسلسل اللي شغال فيه ٢٤ ساعه مبروحش بيتنا عشان يلحق العرض والواحد ساكت و بيعدي بلاوي عشان الزنقة والظروف'.

وتابع: 'أنا متربي في ستوديوهات كبرنا انا و اللي زيي اللي كان بيتقال عليهم ابناء الفنانين كانها شتيمة علي احترام مهنتنا مواعيدنا و مذاكرتنا وتحضيرنا للشغل احترامنا للكلمه قبل العقد للاسف شركة الانتاج ملتزمتش معايا باتفاقهم اللي علي اساسه وافقت اشتغل و كان شرط اساسي لقبولي الشغل معاهم و الحقيقه اول مره اشوف تصميم دعايه عمل فني من افيشات و برومو بتعمله زميله في العمل طول عمري كنت فاكرها من اختصاص شركة الانتاج الحقيقه انا ضهري في الحيط اكمل و اقبل بالعبث ده عشان باقي الزملا الفنانين و الفنيين المشاركين في العمل اللي ملهمش ذنب و الا اقعد في بيتنا و اكتفي باللي صورته و اطلب من النقابه تجيبلي حقوقي الماديه و في كل الاحوال انا بعتذر لاي شخص بيحبني عن تواجدي في هذا العمل لان الحقيقة اللي بيحصل ده مهزله'.

مسلسل كله بالحب

مسلسل كله بالحب تدور أحداثه في إطار درمي اجتماعي تدور أحداث المسلسل، حول العلاقات الأسرية والزوجية، وذلك حيث تنشأ خلافات بين زوجين، تؤدي إلى ترك الزوج المنزل ورفضه لفكرة الطلاق. وهو من تأليف أحمد الشخيبي وإخراج عصام عبد الحميد، وبطولة أحمد السعدني وزينة وصابرين وسامر المصري وريم البارودي.