اتهم المطرب الشاب شادي شامل، الشاعر الغنائي تامر حسين، بالتسبب في حذف موقع الفيديوهات 'يوتيوب' أغنيته الجديدة 'يا معود قلبي'، بحجة أنه لم يتقاضى أجره المادي كاملًا منه، مؤكدًا أن هذا الكلام ليس صحيحًا.
ونشر شادي شامل، عبر صفحته الشخصية بموقع التواصل الاجتماعي 'فيسبوك'، منشورًا كتب فيه: 'تامر محسن بيدعي أني ما دتهوش فلوس الأغنية مع أنه عاملي تنازل من سنتين على الأغنية في المصنفات الفنية ومختوم بختم الجمهورية وواخد أجره المادي الكامل باعتراف منه ومعترف بذلك في التنازل وقالي بعد ما عمل التنازل الأغنيه ملكك يا شادي أنت تعبت وتستاهل'.
وأضاف شادي، أن تامر يقول عليه 'حرامي'، وسرقه، رغم أنه تنازل عن الأغنية بكامل إرادته، وتواصل معه عندما ذهب إلى المصنفات الفنية حتى يرسل له صورة من جواز سفره'، مشيرًا إلى أن من حظه السئ أن كل شيء يمتلكه ضده بالدليل والوثائق'.
وتابع شادي: 'كان بيجيلي الاستوديو ويشهد على ذلك الموزع مهاب سامي وتامر كان في الاستوديو بيوجهني مع أني ملحن الأغنية بس ما حبتش أكسفه وأرفع عليا قضية في المحكمة الاقتصادية بعد سنتين من التنازل، ويطلب من المحكمه بإلغاء التنازل والمحكمة حكمت بعدم الاختصاص، وهذا هو قضاء مصر المحترم ولم يصدر حكما رسميا بعدم نزول الأغنية ووقف الأغنية'.
تامر حسين يرد على شادي شامل
ومن جانبه رد الشاعر الغنائي تامر حسين، على ما كتبه شادي شامل، من خلال منشور له عبر صفحته الشخصية بموقع التواصل الاجتماعي 'فيسبوك' وكتب: ' الحقيقة إني والله ما باحب أرد على بوستات المشاكل دى تمامًا وعلى عيني بس قدرنا والحمد لله وعندي صحة كلامي بمسجات وواتس أب وأساتذتنا فى المصنفات الفنية الزملاء المحترمين وحاجات مايصحش تظهر في العلن ذوقيًا وكرم أخلاق مني اه والله العظيم ما خفي كان أعظم بس هاكتفي بالرد على نقطتين محتاجين توضيح المُقابل المالي وعدم اقتناعي التام بالشخص كمطرب'.
وأضاف تامر: 'لإن واضح ان الناس مؤخراً فاهمه البجاحه تريند أعمِل إيه عشان أكسب تعاطف الناس ؟؟؟ أه أقول دي كانت أغنيتي وكان هايدوها لمطرب كبير وكلمتين مؤثرين مُستقبلي وحرام فا يتعاطف الناس اللي ماتعرفش الحقيقة والله يسامحه اللي بدعها.. فالأخ كلمني في 2019 على كلام الأغنية اللى المفروض يغنيها مُطرب أو أي فنان له جماهيرية يضيف للعمل ويشهره يشهر لحن الأستاذ ويشهر كلامي ونستفاد كُلنا إن قُدر لها النجاح والجمهور حبها'.
وتابع: ' قالي مراتي قررت تعملي الأغنية دي للشاب خالد وقالي إنه يغنيها الشاب خالد دويتو معاه قولتله أفيدلك تخلي الشاب خالد يغنيها لوحده لأن صوتك جنبه هايبقى على قده أنت توصل اللحن أوك انما ديو دى حاسسها تعملك مشكلة أكتر ما تفيدك وفر فلوسك، المهم دخلنا في الجد قالي عايز التنازل عشان أطمن خالد ومراتي تتأكِد من جدية الموضوع لا تفكرني بهزر معاها بكُل حُسن نية وذوق مني سّبقت وخلصت الورق المطلوب مني عشان أنقذله الموقف ويطلع صادق'.
وأردف تامر في منشوره: 'فجأه بعد حماسه والشاب خالد وحلم الأحلام اللي عايز يأكده للمقربين منه اختفى لا جاب سيرة مقابل ولا خدت منه مليم والله العظيم وحياة أولادي ما خدت منه مليم وهيبقى عنده مليون طريقة إثبات رقم حساب بنكي أي إيصال تحويل مسج بيقولي بعتلك كذا أي أمارة حتى يقول للمدام إن فلوسها مارحتش في الهوا ويثبت صحة كلامه كل ده ماخدتش أصل التنازل فوجئت بمكتب المُصنفات وانا براجع معاهم ورق قالولي أنه جه يطلع أصل التنازل من الصورة عشان الأصل ضاع منه طب ده حضرتك تسميه ايه 'سرقة ولا نصب ولا بجاحه ولا هبل' اختاروا انتوا المُسمى المُناسب'.
واستطرد: 'اكتفيت إني أعمله بلوك لكل أرقامه وفضلِ من 2019 لـ 2021 لحد من 3 شهور بيوسط أى حد أعرفه وقريب مني إنه بيعتذرلي وإنه غلطان وعرف غلطته وقالهم خلوني أقابله وأنا رافض رفض تام وزمايلنا اللي وسطهم يشهدوا فضِل ورايا قد ايه ؟؟؟؟ يعتذر ويتأسِف لحد من 3 شهور كلمني من رقم غريب رديت قالي بالنص 'والنبى ماتقفل السكة في وشي أنا آسف' وغلط وعايزك تسامحني اتحرجت وقلت عفى الله عما سلف، بس لا تكلمني في فن ولا تبعتلي ألحان والأغنيتين تلاتة اللى عاملهم معاك انسى كلامهم قالى حاضر انا ماشفتش منك غير كل خير وحقك عليا يا أخويا وصفحة جديدة'.
وأنهى الشاعر الغنائي تامر حسين منشوره قائلًا: 'قابلت صديق لينا مُشترك بيقولي لسه شايف فيديو أغنيتك مع الشخص ده قولتله لاء ده انا مش مديله تنازل بيها وكنت عامله محضر وبعتلي رسايلي أرجوك انا صرفت اللى ورايا وقدامى ع الفيديو خليك جدع معايا وسيبهالى أسيب اللى سرقنى؟ ونصب وكدب ؟ واسيب لك ليه ؟ وانا مش مقتنع بيك كمطرب أنا فوق رأسي أحلامك انت والمدام بس ماليش علاقة بيها نفذها بشرف مش على أكتاف ناس مُحترمة، راح صور الكليب دون علمي دون دفع مقابل مادي واستحل حقوقي وقال يعني بيحطني قدام الأمر الواقع وهو عارف إني والله لو كان دفعلي مال الدنيا ماكنت هشتغل معاه بعد الانطباع السيئ اللي سابهولي'.
تابعوا آخر أهل مصر على Google News
