علقت ندى الكامل زوجة الفنان أحمد الفيشاوي، على تريند البوركيني أو المايوه الشرعي، الذي أثار الجدل مؤخرا بعد منع عدة فتيات من النزول به للسباحة، وذلك عبر حسابها الشخصي على موقع التواصل الاجتماعي فيس بوك.
وقالت ندى الكامل: 'اللي زعلان من حكاية البوركيني دي والمايوه البكيني، اعملوا أماكن للستات دي والبنات اللي بتلبس بوركيني ويتفصلوا واللي عاوز بقى يحتفظ ويطبق قوانينه في مكانه يطبقها، ونخلص بقى من الحكاية الهبلة دي، انتوا بتتخانقوا عشان حتة قماش زيادة أو حتة أقل، وفي عز ما إحنا بنتخانق، أحب أقول إن الستات طلعت القمر وبيشتغلوا وبيحكموا بلاد كبيرة وانتوا لسة بتتخانقوا على مايوه حاجة حزينة فعلا'.
وتابعت: 'أظن حكاية تخصيص أماكن لأي طرف متضرر دي حكاية سهلة، وبعدين بصراحة أنا شوفت كتير وشوفت محجبات على البيسين ومكنش يوم سعيد بالنسبة لي أبدا، خصوصا بعد ما لاقيت البيسين كله بيصورنا أنا وجوزي وساعات لوحدي كمان ومع ولادي، وأنا مش بعمم أنا بقول موقف وحصلي على وجه الخصوص وليس التعميم، لكن للأسف ده اللي بيحصل، ناس بيسيبوا كل حاجة ويمسكوا تليفونتهم وبيصورونا وبيفضلوا يفصصوا فينا.. وأنا مش بعمم.. دي تجربة حقيقي حصلت لي.. وبتحصل لأي حد موجود من الطرفين.. دول بيبقوا مضايقين من دول والتانين زعلانين برضوا'.
وأكملت: 'اللي عاوزة تلبس تلبس واللي عاوزة تغطي تغطي، كلها في الآخر مية واللي لابسة البوركيني بتطلع المايوه لازق على جسمها ومفسر كل حاجة، واللي لابسة بكيني برضة مختلفتش عن التانية، نهدى بقي عشان دي حكاية سخيفة أوي، وزي ما اللي لابسة بوركيني زعلانة أنها ساعات بيمنعوا نزولها، أنا من الناس اللي مش بلبسوا وبزعل برضة من أن الناس مش بتسبنا دقيقة من غير ما يبصوا ويعكننوا علينا فلوسنا ووقت إجازتنا اللي بنستناه'.
واختتمت: 'فكلنا متضررين محدش بقى يزايد على حد ولا يزكي نفسه.. عشان إحنا كلنا جوة خلاط اسمه انتهاك الخصوصية وبنتفرم فيه كل يوم'.
تابعوا آخر أهل مصر على Google News
