أعربت الفنانة عبير صبري، عن غضبها الشديد من تداول الأخبار السلبية عن الفنان الشاب كريم صبري شقيق المطرب رامي صبري، والذي توفي أمس، غرقا في ترعة المريوطية بعد قفزه فيها هربا من المصحة التي كان يعالج فيها.
وفاة شقيق رامي صبري
وكتبت عبير صبري على إنستجرام: 'ربنا يرحم الشاب كريم صبري ويعفو عنه شقيق الفنان رامي صبري الحقيقة أنا بناشد كل المؤثرين على السوشيال ميديا أنهم يطالبوا المجلس الأعلى للصحافة ومؤسسات الدولة المصرية ومجلس النواب أنها توضع قوانين لتنظيم النشر ووضع حدود للأخبار الشخصية اللي بتخص المشاهير في اي مجال فني او غيره'.
وأضافت عبير صبري: 'مش معقول ولا مقبول إن شاب يتوفي في حادث غرق وننشر شيء خاص بمرضه ومنحترمش مشاعر عيلته، أمه وأبوه وأخواته ونتاجر بأخبار الشاب المسكين لأنه مدمن والإدمان بالمناسبة مرض أكرر مرض زي السكر والضغط والأمراض المزمنة يعني مش قلة أدب ولا قلة تربية زي ما أغلب الناس فاهمة وعاوز علاج وله مستشفيات خاصة'.
وتابعت: 'مش معقول المواقع كلها تتسابق في نشر تفاصيل أنه مدمن وتجرح أهله وكان مش كفاية مصيبتهم وحسرتهم علي أبنهم وطبعاً أذية الفنان رامي صبري والإساءة لسمعته، أنا مش عارفة هتستفيدوا إيه مفيش رحمة بالأهل مفيش أخلاق الستر مفيش أخلاق أنك متتدخلش في شيء لايعنيك ولا يعني جمهور السوشيال ميديا ، ليه القسوة والرغبة في دبح الناس معنويا؟ خصوصا لو كان مشهور'.
وأكملت عبير صبري: 'مش كفاية اللي هما فيه انتوا يعني مش عارفين أن كل البيوت فيها مشاكل وأمراض وبلاوي مقفول عليها بابها.. إيه السبب انكوا تنشروا بهدف إحراج الناس وهتك أسرار البيوت؟ عشان فيها شخص مشهور زي الفنان رامي صبري فنبهدله ونطلع أسرار أخ له توفي وهو يعاني مرض من الله زيه زي ملايين الشباب عشان الترند والمشاهدة أقولكم إيه بس؟ أنا قلبي وجعني على الشاب المسكين ده ومعرفوش'.
واختتمت: 'لكن بتمنى له الرحمة والمغفرة بعد موته الصعبة ولأهله الصبر أمه وأبوه وأخوه ربنا يصبرهم ويناشد تاني كل المؤثرين على السوشيال ميديا، ينضموا ليه ويطالبوا المجلس الأعلى للصحافة بتنظيم النشر وعدم هتك أسرار الناس واغتيالها معنويا بدون داعيً طالما شيء شخصي لايفيد مجرد كومنتات شتايم ولايكات وترندات هتسألوا عليها يوم القيامة في مظالم حقوق العباد'.
تابعوا آخر أهل مصر على Google News
