ملخص تصريحات سميحة أيوب مع لميس الحديدي: أحد أزواجي كرهني في الرجال.. ومنتقدي المومس الفاضلة يتبعون منهج لا تقربوا الصلاة (فيديو)

حلت سيدة المسرح العربي سميحة أيوب ضيفة على الإعلامية لميس الحديدي، في برنامج كلمة أخيرة على قناة ON. وبسبب تصريحاتها في هذه الحلقة تصدرت مؤشرات البحث على جوجل مصر. لذا نرصد ملخص تصريحاتها في السطور التالية.

تصريحات سميحة أيوب في برنامج كلمة أخيرة

- الكتابة اتغيرت كنا زمان بنقف على خشبة المسرح نقول رسايل حتى لو كانت سياسية وكنا ننتقد النظام بحب مش بقلة أدب

- في ناس بتتكلم عن الحرية وتنتقد بقلة أدب

- إنّ من ينتقد مسرحية المومس الفاضلة لم يقرأ المحتوى، وهؤلاء اتبعوا منهج لا تقربوا الصلاة وتجاهلوا وأنتم سكارى

- لما المسرحية اتعرضت عليا قلقت لإني كنت صغيرة وناقصة ثقافة مسرحية كبيرة.. كنت بأفكر فقط في الأدوار الخفيفة

- مسلسل إجازة مفتوحة الذي قدمت فيه شخصية بيجا، أخذ مناحى الحياة ومشاكلها الكثيرة وظواهرها الغريبة، وناقشها من منظور واقعى

- سألت لميس الحديدي سيدة المسرح 'لو جالك عريس هتعملي ايه'، لترد سميحة أيوب: هنضحك الناس علينا ليه، الست بيجا في مسلسل إجازة مفتوحة حاجة وسميحة أيوب حاجة تانية

- مليش علاقة بالسوشيال ميديا ومعنديش حساب على أي موقع

- اتجوزت الفنان محسن سرحان وأنا مراهقة وافترقت عنه وأنا عندي 18 سنة

- قعدنا 3 سنين متجوزين وفي الفترة دي توقفت عن المعهد

- قعدني في البيت وأنا كنت مبسوطة قوي إن أنا قاعدة في البيت، وبعدين سقطت الأقنعة، فرجعت تاني للفصل اللي خرجت منه، وكنت داخلة السنة الثالثة

- الفنان الكبير زكي طليمات كان حزين حزن شديد جدا إني تزوجت وكان ليا زميل وجارنا اسمه إبراهيم فتيحة، عرف إني سبت البيت، وراح قال للأستاذ زكي، فقال له روح لسميحة في بيت أهلها وقول لها تيجي وأنا هدخلها في نفس الفصل. روحت للأستاذ زكي، وكان الحقيقة لقاء عاطفي جدا، خدني في حضنه وطبطب عليا،، وقالي إنتي وردة يدوب هتبدأ تتفتح

- محسن سرحان أني كرهت الرجالة كلها، لأن الضغط الزائد عن اللزوم ويقفل عليكي الباب بالمفتاح ومتقعديش مع أمك ولا أخواتك فهو كان صعب الله يرحمه

- زواجي من محمود مرسي جاء بعد قصة حب كبيرة جدًا جدًا، واطلقنا وأحنا بنحب بعض جدًا، وسبب الطلاق أني بشتغل كتير والحقيقة كنت ظالماه، وقالي البيت وكده لأني كنت بخرج الصبح أروح الإذاعة وبعدها بروفة وبعدها التليفزيون وبعدها أعمل السوارية وبعدها أروح، وقالي إنتي صعبانة عليا يا سميحة بتحاولي لما تيجي تعملي مجهود مضاعف عشان تحسي أنك مش مقصرة فانتي صعبانة عليا، قولتله أنا ببني نفسي وأحنا بلد ذاكرتها ضعيفة لما بتمشي من الصورة بتتنسي فأنا دلوقتي عايزة بس أبقى في الصورة أثبت وقالي تفتكري الحياة هتستقيم وهو بالفعل كان مظلوم وخلفت منه ولد على طول