المشرف العام على التحرير داليا عماد
اعلان

ملخص تصريحات عمر كمال في برنامج الحكاية: في فنانين منفسنين مننا وأنا بتأذي من الشتايم في بعض أغاني المهرجانات (فيديو)

أهل مصر
عمر كمال
عمر كمال

حل مغني المهرجانات عمر كمال ضيفًا على برنامج الحكاية الذي يقدمه الإعلامي عمرو أديب على قناة MBC مصر. وخلال الحلقة آدلى عمر ببعض التصريحات التي جعلت منه حديث مواقع التواصل الإجتماعي خاصًة بعد الأزمة التي نشبت بين نقيب الموسيقيين الفنان هاني شاكر ومطربي المهرجانات، كما آجرى مداخلة هاتفية مع معتز عبد الفتاح في برنامج تحت الشمس، وكان له تصريحات مثيرة أيضًا وإليكم ملخص تصريحات عمرو كمال الأخيرة.

ملخص تصريحات عمرو كمال المثيرة للجدل
- أنا عندي حل للخناقة الدايرة حاليًا بين مطربي المهرجانات وبين نقابة الموسيقيين، لازم يكون فيه شعبة لأغاني المهرجانات زي شعبة فن الراب، ومطرب المهرجان أديله تصريح مؤدي مهرجانات

- مطرب المهرجان ممكن يعمل 10 مهرجانات في اليوم، كل اللي محتاجه لاب وفلاشة ومايك، بعكس نجوم الغناء اللي بتتكلف الأغنية الواحدة أكتر من 300 ألف جنيه بسبب الكلمات والألحان والتسجيل

- أنا لما أوقف حمو بيكا في لجنة استماع قدام حلمي بكر يبقى بظلمه

- اللايف هو الأساس في الربح للمطرب وأكتر من اليوتيوب بكثير

- نوعية أغاني المهرجانات والراب هي الامتداد الطبيعي للغناء الشعبي المصري، الأغاني دي الامتداد الطبيعي لـ السح الدح امبو وسلامتها أم حسن

- الست أم كلثوم كانت بتقول أغدا ألقاك، والأستاذ أحمد عدوية كان بيقول السح الدح امبو، وباع مليون نسخة وكسر الدنيا بـ زحمة يا دنيا زحمة وبنت السلطان

- يا جماعة ده في كل عصر مش إحنا بس.. الأستاذ عبد الحليم حافظ كان بيروح كازينو الليل يسمع أستاذ أحمد عدوية، وكان بيخليه يسمعه أغانيه

- لازم تقنين أوضاع مطربي المهرجانات، دلوقتي مفيش اعتراض على المزيكا، وعايزين كلام كويس، يبقى نقنن الموضوع، هتقولوا أصوات، هقولكم طيب ما أنتوا أجازتوا الراب.. الثقافات اتغيرت ولازم نتقبل ذلك، كل جيل وله مزيكته وشكله

- إحنا بنروح دول أوروبية والأجانب بيسمعونا، وبنتقابل أحسن مقابلة بره والناس فاهمة إن دي مزيكا جديدة

- في بعض الفنانين الكبار (منفسنين) مننا، لما ألاقي واحد اسمه عمر كمال وحسن شاكوش جايبين 700 مليون مشاهدة في أغنية (بنت الجيران)، و500 مليون في (عود البطل)، إحنا أقل أغنية عندنا جايبة 60 مليون مشاهدة

- أنا نص أعمالي أغاني ونصها مهرجانات

- قرار هاني شاكر فيه جزء كبير صح وأنا معاه قلبا وقالبا، لأنه بجد في ناس بتوع مهرجانات بيقولوا كلام مينفعش يتقال خالص، وأنا بتأذي منه، والفئة دي فعلا لازم تتمنع، أنا بقول ده إزاي يتقال، لأنها شتايم علني وعيني عينك، النوع ده لازم يتمنع

- أنا وحسن شاكوش وحمو بيكا أكتر شباب دخلت موارد للنقابة، إحنا بندفع 10 آلاف جنيه في الأوردر في الساحل، وكنا بنعمل 3 حفلات في اليوم، يعني أنا كنت بدخل للنقابة 30 ألف جنيه في اليوم الواحد، يعني أنا وحسن وبيكا بندخل للنقابة في اليوم الواحد 100 - 120 ألف جنيه.. احتوا الشباب دي يا جماعة

نقابة الموسيقين تمنع مغنين من الغناء
وكان أعلن رئيس لجنة العمل بنقابة المهن الموسيقية، منصور هندي، قائمة تضم الممنوعين من الغناء، وكشفت النقابة عن أسماء من ليس لديهم تصريح للعمل.

وجاءت الأسماء الممنوعة من الغناء كما يلي: "حمو بيكا، حسن شاكوش، كزبرة وحنجرة، مصطفي زكريا الشهير بمسلم، أبو ليلة، أحمد قاسم الشهير بـ فيلو، أحمد موزة، حمو طيخة، ريشا كوستا وسمارة، شواحة، ولاد سليم، العصابة، الزعيم، علاء فيفتى، فرقة الكعب العالى، مجدى شطة، وزة، شكل، عمرو حاحا".

وشددت نقابة المهن الموسيقية في بيان لها: "يمنع منعاً باتاً من ليس عضواً بالنقابة وغير مصرح له، بالعمل لحين تصحيح أوضاعهم بالنقابة واجتياز الإختبارات".