أعلن الفنان الشاب شريف إدريس، اليوم الخميس، عن اعتزاله المهنة، وذلك لتعرضه للظلم وعدم التقدير في العديد من المواقف، مطالبًا بتوفير أي فرصة عمل له بالخارج.
وقال 'إدريس'، عبر حسابه الرسمي، على موقع التواصل الاجتماعي، فيس بوك: 'بسم الله الرحمن الرحيم، بعد ٣٥ سنة سعي وتعب وشقي في الوسط الفني قررت الإعتزال والإبتعاد تمامًا وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد'.
وأوضح: 'وده قرار أخدته بعد ما الأمور وصلت في الوسط الفني لمرحله عبثيه وصلت إني بقيت بشوف بعض الزملاء بيشحتو الشغل علاني علشان يشتغلو لإن الشغل بقي متقسم علي ناس معينه، فلو الأمور وصلت لكده أبعد أحسن، وحتي لما بيجي شغل بيتفرض عليك توافق بأقل الفلوس وتخرج من الشغل مديون، ومواقف مهينه زي إن شركة إنتاج تعرض عليك أجر هو قيمة ربع أجرك والسبب إنهم الميزانيه مصروفه عالديكور، طب خلو الديكور يمثل'.
وتابع 'إدريس' قائلًا: 'هحكيلكم موقف حصل معايا من اسبوع، اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور، كان هيجيلي جلطه بعد ماقفلت المكالمه ووافقت علشان أنا محتاج اشتغل ومحتاج فلوس، وماقدرتش استوعب الفكره بصراحه إني بعد العمر ده مضطر ادفع علشان اشتغل فاتصلت واعتذرت، وده الحال حاليًا إن الامور بقت في ايد كاستينج دايريكتور، وده موقف من مواقف كتير مريت بيها لو حكيتها محتاجه كتاب مش بوست عالفيس'.
وأضاف: 'فطالما الشغل بقي لازم يتدفعله، وطالما الشغل بقي بالشحاته، يبقي بلاش احسن، أنا طول عمري راضي الحمد لله، بس حقيقي أنا وصلت لمرحلة إكتئاب وصلتني إني بقيت بنام احلم بكابوس إني بقتل عيالي وبقتل نفسي لأني وصلت لمرحله نفسيه وماديه إني بقيت مش قادر أربيهم ولا اصرف عليهم وأنا عندي تلات أطفال بعبدهم عباده متخيلين حجم المسؤليه، وبقيت مديون لطوب الأرض'.
وتابع: 'حقيقي لو حد عنده فرصة سفر ليا هاكون شاكر ليه جدًا وهيكون جميل في رقبتي لحد ما أموت لأن حقيقي أنا مش قادر اعيش في البلد دي تاني أنا حاولت اسعي في أي مجال تاني بس ماقدرتش، وحقيقي لو اتعرض عليا بطولات بعد البوست ده هرفضها لأن البوست ده هو، نهاية علاقتي بالمجال إللي إتربيت فيه ودرسته وعشت فيه كل تفاصيل حياتي والحمد لله علي كل شئ'.
واختتم كلامه قائلًا: 'همسح ابلكيشن فيسبوك من تليفوني لإني هنزل أبيع تليفوني اصلًا، فأنا هاكون متاح اونلاين لحد بالليل، لو حد عنده فرصة شغل وسفر ليا ومش معاه رقمي ياريت يجيبه من أي حد، ملحوظه:أنا مش محتاج طبطبه من حد أنا محتاج فرصة سفر وشغل تخليني اعيش ولادي حياه كريمه وبس، شكرًا ليكم محبتي للجميع، هاين عليا أقوم أرمي نفسي من البلكونه بعد ماوصلت إني أكتب البوست ده'.
ويذكر أن شريف إدريس هو ممثل مصري، بدأ العمل بالتمثيل وهو طفلاً، وكان بداية ظهوره في منتصف ثمانينات القرن العشرين بأعمال تلفزيونية وسينمائية، ومن أعماله السينمائية (الاتحاد النسائي، أسعد الله مساؤك، المفسدون)، ومن أعماله التلفزيونية (على باب الوزير، عفاريت السيالة، الهروب).
تابعوا آخر أهل مصر على Google News
