شن عدد من الفنانين هجوما حادا على المسئولين عن الإنتاج الفني، بسبب عدم مشاركتهم وقلة الأعمال المعروضة عليهم، وأعرب الفنان فادي خفاجة، عن استيائه الشديد من ندرة الأعمال الفنية المعروضة عليه، وكتب عبر حسابه الخاص على موقع التواصل الاجتماعى 'فيس بوك': 'هو جيل التمانينات اتحكم عليه بالإعدام، طيب اعدمونا أحسن ما نموت كل يوم، الواحد مر بكل مراحل الاكتئاب ومش عارف هيروح فين تاني، كل المسلسلات ديه ومبنشتغلش.. طيب ليه؟'.
ورد الفنان كريم مغاوري قائلًا: 'مش ناقض غير يضربونا بالنار زي خيل الحكومة، ربك هيفرجها من عنده ربنا اسمه العدل وحرم الظلم على نفسه لكن العباد الظلم فيهم سيد'.
وكتب الفنان مراد فكري: 'ياااه يا فادي دا أنت قولت كل الكلام اللي تاعبني وماحدش سامعنا ولا شايف الجيل دا رغم نجاحنا ورصيدنا اللي الناس حافظاه بس المهنة اختلفت في كل شيء، أنا كتير بحس إني شغال في مجال جديد أو أنا اللي جديد عليهم، بس ربنا كبير وأنت نجم وفنان'.
اتكتب علينا الإعدام
وعلقت الفنانة راندا البحيري قائلة: 'اتكتب علينا الإعدام ومش المفروض نشتكي ولو اشتكينا يتقال لنا عيب، أنا بسبب إني مش بمثل دخلت مشاريع علشان اشوف أي شغلانة تانية وبيتنصب علي عادي جدًا علشان أنا عشت عمري كله ممثلة ومكنتش أعرف إني المفروض أتعلم حاجة تانية أو شغلانة تانية علشان هييجي اليوم اللي الشغلانه تقلب علينا عادي جدًا كده'.
وعبرت الفنانة ليلى قاسم، عن حزنها الشديد قائلة: 'حاجه تحزن والله العظيم يا فادي، أنا ساعات بندم والله اني فكرت أدخل المجال ده في يوم من الأيام، احنا اللي زينا تحس علينا لعنة اسمها حب الفن للأسف'.
من جانبها، هاجمت الناقدة دعاء حلمي، الفنان فادي خفاجة، وغيره من الفنانين بعد تعبيرهم عن استيائهم لعدم وجود فرص عمل، قائلة: 'هو كل واحد الطلب عليه قليل بلغة السوق يطلع يقولك اعدمونا بقى.. مش معنى انك اشتغلت وانت طفل إنك تفضل على قلبنا العمر كله، ولا حتى نجحت وبقيت نجم بس مش محافظ على لياقتك وقدراتك التمثيلية اللي على فكرة ممكن تصدي لو ما اشتغلتش عليها يبقى انت مكتوب على بطاقة المنتجين وقبلهم الجمهور'.
عمرك الافتراضي خلص
وتابعت دعاء: 'مش معنى ان حضرتك مذيع عمرك الافتراضي خلص ع الشاشة يبقى نستحمل تقل ظل حضرتك مدى الحياة وتفضل شغال عشان دي مبرة خيرية وفيه نسبة معاملة أطفال'.
وأضافت: 'التمثيل وأي مهنة بتعتمد على الكاريزما والممارسة والتدريب زي كرة القدم زي أي رياضة زي أي مهنة بتعتمد على اللياقة والعرض والطلب زي الظباط زي مضيفين الطيران، في حالة الإصابة بيتحول لعمل إداري بعيدًاعن مهنته الأصلية'.
واختمتت حديثها قائلة: 'التمثيل مهنه لو لقيتها مش مكمله معاك جايز يكون واحد في المي أن العيب فيك وده مش عيب أصلًا ان جملتك خلصت ومعندكش حاجة تقولها'.
تابعوا آخر أهل مصر على Google News
