وجه الفنان تامر حسني رسالة إلى طلاب وأساتذة الثانوية العامة بالإسكندرية، بعدما نفذ عدد من الطلاب هناك مفطع فيديو تحفيزي لهم واستعانوا بكلمات وأغاني لتامر حسني كطاقة إيجابية لهم.
وقال تامر حسني:'طلاب وأساتذة الثانوية العامة الاسكندرية مش عارف اقولكوا قد ايه فرحت بكلامكوا و باللي شوفته في الڤيديو من محبة صادقة و تأثير صادق و حقيقي بينا، شكراً لكل طالب حس كلمة إيجابية مني و أثرت فيه سواء في كلامي او أفلامي او أغانيا، شكراً لكل مدرس حط رسايلي الصادقه ليكم في عين الإعتبار و خاطبكم بها'.
وتابع تامر قائلا:'و حمداً لله ان علاقتنا مش مجرد فنان و جمهور لا دي أكبر من كدا بكتير ودي العلاقة اللي حلمت بيها من صغري، بقدر الإمكان بخرجلكم من رحلتي كل ماهو إيجابي ليكم من نصيحة أخ إلى كلمة تحفيزية واللي جاي مني ليكم أكتر و أحلى بإذن الله وواثق أنه هيوصل قلوبكم عشان زي ما قولتلكوا زمان اللي بيطلع من القلب بيوصل للقلب، شكراً شكراً طلاب إسكندريه و شعب إسكندريه العظيم شكراً شباب مصر أم الدنيا يارب كلكم ناجحين و اللي عنده خطأ يصلحه، الحياة لسه قدامكم و الوقت لسه في إيدكم'.
وأضاف تامر حسني قائلا:'اي صعب هيعدي وبكرا تنجحوا و تبقوا أصحاب قصص حياة جميلة كل واحد فيكم لازم يبقى بطل في قصة حياته عشان كدا متزعلوش من أي صعب و اي اخطاء و اي فشل في اي اتجاه الحياه رحله ومشوار طويل مش موقف ولا موقفين، والحل الوحيد أننا ننجح و نعتمد على نفسنا و تتعلموا أنكم متسندوش على أشخاص عشان لو مشيوا متقعوش أسندوا على، اولاً ايمانكوا بربنا دا اهم و اقوى سند تاني حاجه اسندوا على حلمكم و مجهودكم و نجاحكم اسندوا على قوتكم انتوا و هقولهالكوا تاني احنا في زمن صعب لو احتاجت ايد تسندك و تدفيك امسك ايدك التانيه برغم أن في كتير طيبين بس الحياة تلاهي و اللي سندك مرة مش هيسندك التانية ، وكمان جه دوركوا أنكم تفرحوا أهاليكم و تكونوا أنتوا سندهم عشان لما بيكبروا هما اللي قلوبهم بتتحول قلوب أطفال و بتحتاج رعايه منكم انتوا بيبقوا محتاجين انكم تردولهم اللي عملوه معاكم وانتوا صغيرين'.
وأختتم تامر حسني حديثه قائلا:'معلش طولت عليكم و عارف أن من سمات العصر أنكم مش بتحبوا تقروا الكلام الكتير بس أنا عارف كلامي رايح لمين رايح للّي محتاجينه و مستنيينه فا هيقروه كويس جداًعشان من كل قلبي لحبايب قلبي و ان شاء الله هشوفكوا قريب..بالتوفيق يا أمل مصر'.
تابعوا آخر أهل مصر على Google News
