المشرف العام على التحرير داليا عماد
اعلان

غادة إبراهيم تفجر مفاجأة: «محدش شكاني واللي اتعصبت عليها مش ممثلة» (خاص)

أهل مصر

خضعت الفنانة غادة إبراهيم للتحقيق بمقر نقابة المهن التمثيلية، على خلفية ما بدر منها من مخالفات في جنازة الفنان سمير صبري منذ عدة أيام.

وقالت غادة إبراهيم في تصريح لـ «أهل مصر»: "خضعت للتحقيق امبارح وخلصنا واحدة ونص بليل، وكنا متأخرين جدا وجيت النهاردة وخضعت للتحقيق مع سيادة المستشار إسلام مستشار مجلس الدولة وعضوين من مجلس نقابة المهن التمثيلية هما الفنانين إيهاب فهمي وأحمد سلامة زملائي الجمال بحترمهم جدا وحققوا معايا وشافوا الفيديوهات وأنا مستنية القرار بتاع المجلس".

وعن سبب طول مدة التحقيق على مدار يومين قالت: "علشان الفيديوهات كتير، بيفتحوا كل فيديو ويشوفوا فيه تجاوز أو ألفاظ ولا لا، وأنا الحمد لله لا قلت لفظ ولا قلت حاجة قلة أدب، حتى المشكلة اللي كان المفروض اتعصبت عليها كانت على واحدة مش من نقابة المهن التمثيلية ولا هي ممثلة".

وعن سبب التحقيق أوضحت غادة إبراهيم قائلة:"خصمي النقابة، مفيش حد شكاني، مجلس النقابة كان عايز استفسار وانا رحتله".

وأضافت عن سبب تواجد محاميها معها طوال التحقيق:"بخاف ألغبط أو أقول حاجة، فلازم يبقى فيه محامي محترم أستاذ باسم المحامي بتاعي بيرد عليها ولازم يبقى موجود علشان أنا ممكن اقول حاجة غلط".

ووجهت غادة إبراهيم رسالة لجمهورها قائلة:"والله العظيم أنا من غيركم ولا حاجة، بحبكم أدعموني بعد أذنكم وقولوا أن احنا بنحب غادة شوفوا انتوا هتدعموني أزاي، لأن انتوا لللي هتدوني طاقة إيجابية وبشكركم جدا".

وكانت الفنانة غادة إبراهيم أثارت الجدل يوم السبت الماضي، خلال حضورها تشييع جنازة الفنان سمير صبري من مسجد الشرطة بالشيخ زايد، بعدما انهارت غادة واتهمت فنانة تدعى "إلهام" بمنعها من استقلال الأتوبيس المتجه للإسكندرية لدفن الفنان سمير صبري.

وظهرت غادة في جنازة سمير صبري، وهي منهارة من البكاء وقالت في تصريحات إعلامية:"حسبي الله ونعم الوكيل في إلهام بنت عفاف وإلهام بنت سعاد.. الوحشة قاعدة ترازي فينا، لكن الناس الكويسة المحترمة هي اللي بتروح مننا، قالتلي متركبيش الباص..جيت أطلع الباص قالتلي الباص اكتمل، دول ميعرفوش ربنا، واحدة متعرفش ربنا ولا الآخرة ولا دين ولا دنيا، الله ينتقم منهم وأنا صايمة".

وتابعت غادة إبراهيم حديثها قائلة: "اللي عملت كدة بدعي عليها في كل صلاة وآذان، يارب خدهم بحق صيامي، هم دول يعرفوا ربنا، دي دخلت جامع تصلي هي طاهرة؟، هل هي طاهرة؟، دي شكل الساحرة الشريرة، دي مخاوية شياطين".