علق الشاعر بهاء الدين محمد، على الإساءة التي وجهتها الفنانة شيرين عبد الوهاب، للموسيقار الراحل حسن أبو السعود، خلال مداخلة هاتفية في برنامج 'كلمة أخيرة' مع الإعلامية لميس الحديدي.
ونشر 'بهاء الدين'، عبر حسابه الخاص بموقع التواصل الاجتماعي 'فيس بوك'، صورة للملحن الراحل حسن أبو السعود، وعلق قائلًا:'حسن أبوالسعود، حبيبى اللى عمرى ما حسيت إنه مش ف الدنيا واللى كل الوسط بيحبه وكان وجوده في أي مكان بيعمل حاله من البهجة بروحه الطيبة وقلبه اللى كله حب وفن'.
وأضاف:'الفنان اللى عملنا مع بعض نجاحات عايشه لحد النهاردة ومنها (أسف حبيبتى – لما النسيم – فى ناس- أصعب حب – وعدا الليل –عمال يحكيلى عنها)، ومئات الأغانى اللى كان بخبرته في اللايف بيعرف يجيب الجملة اللى الناس تحبها وبالفعل سيطرنا سنين على الساحة الغنائية وغيرنا كتير، ده غير أنه كان من أفضل العازفين على الأوكرديون فى العالم'.
وتابع بهاء الدين:'وفي يوم من الأيام وهو نايم تعبان لقيته ابتسملي وسألني أنت عارف مين أكتر حد هيزعل عليا لما أموت؟ قولتله إسم من أسماء ولاده، قالى لأ أنت أكتر حد هيزعل عليا وبالفعل أنا مابقيتش حتى أمشى من شارع بيته وفضلت فترة طويلة أنسا أنه مات لأنه عشرة فن وحياة، وكان بيحبنى كأنى إبنه وكان بيفرحلى بكل نجاح حتى لو مش معاه وح أبقى أحكيلكم إزاى إتقابلنا لأن الموضوع ده مهم' .
وأشار إلى:'والمهم علشان أقول اللى ضميرى بيحسه في موضوع شيرين عبدالوهاب، واللى جهات كتيرعايزنى أقول رأى في كلامها عنه أو وصفها أنا بكل صراحة بأقول ماحستش إنها قاصده تهينه ولا تسخر منه هى بس استدعت سيرته بشكل يبدو ساخر لكن أنا رغم إنى متضايق منها وهو عندى من أغلى الناس إلا إن احساسى قالى إنها ماتقصدش'.
وقال بهاء الدين محمد،:'لأن فعلًا لما كنا بنتقابل كان بيحتفل بشيرين وبيحب فنها والبساطه اللى فيها وهى كانت بتحبه وتحترمه، وللعلم أنا لما كنت بروحله وشبعان ومش طايق أشوف أكل اول ما يقولى تاكل بأداء ماشوفتش زيه بألاقى نفسى بأجوع، الله يرحمه كان فنان ودمه خفيف وقلبه قلب طفل'.
واختتم: 'بس هى غلطانه إنها بتطلع تتكلم ولو ليا سلطة عليها مش هأخليها تنطق لا على مسرح ولا لقاء ولا حتى في حياتها الشخصية أسكتي يا شيرين، بهاء الدين محمد'.
تابعوا آخر أهل مصر على Google News
